08 Сәуір, 2016

Бас ұйым өкілімен кездесті

242 рет
көрсетілді
3 мин
оқу үшін
19-08-hatshi-386x500Кеше Ақордада Мемлекеттік хатшы Гүлшара Әбдіқалықова БҰҰ-ның Қазақстандағы жаңадан тағайындалған резидент-үйлестірушісі – БҰҰ Даму бағдарламасының еліміздегі Тұрақты өкілі Норимаса Шимомурамен кездесті. Кездесу барысында тараптар Қазақстан мен БҰҰ арасындағы ынтымақтастық қарқынды дамып келе жатқандығына назар аударды. Сондай-ақ, жиында 2015 жылы БҰҰ Бас хатшысы Пан Ги Мун және бірқатар арнаулы агенттіктердің басшылары Қазақстанға сапармен келгені, былтыр күзде Қазақстан Президенті Нұрсұлтан Назарбаевтың БҰҰ Бас Ассамблеясының 70-ші сессиясының жұмысына және жоғары деңгейдегі тақырыптық саммиттерге қатысқаны атап өтілді. «Біз Біріккен Ұлттар Ұйымының Бас хатшысы Пан Ги Мунның елімізге 2015 жылғы сапарын жоғары бағалаймыз. Ол өте мазмұнды болды. Қазақстан Президенті БҰҰ-мен өзара қарым-қатынасқа ерекше назар аударады. Жуырда ғана «Әлем. ХХІ ғасыр» манифесі жарияланды. Онда Мемлекет басшысы БҰҰ-ның әлемді қарусыздандыру мәселелеріндегі рөліне ерекше тоқталды», – деді Г.Әбдіқалықова. Бұдан бөлек, Мемлекеттік хатшы «Қа­зақстан-2050» Стратегиясының, «Нұрлы Жол» мемлекеттік бағдарламасының және Бес институттық реформаның негізгі бағыттары БҰҰ Бас хатшысының Бес­жылдық іс-қимыл бағдарламасының басым­дықтарымен, Мыңжылдық Даму Мақсат­тарымен (МДМ) және БҰҰ-ның Тұрақты даму мақсаттарымен (ТДМ) үйлесімді екендігін жеткізді. Сонымен бірге, Г.Әбді­қа­лықова алдағы маусымда Қа­зақстан БҰҰ Қауіпсіздік Кеңесінің тұрақты емес мүшелігіне сай­­ланған жағдайда адамзат ал­дындағы сын-қатерлерді шешу ісі­не қомақты үлес қосуға, соны­мен қатар, Орталық Азия өңірі мәселелеріне халықаралық қо­ғамдастықтың назарын аударуға дайын екенін мәлімдеді. Одан әрі Мемлекеттік хатшы БҰҰ Даму бағдарламасымен бір­лесе қаржыландырылатын жоба­лар аясында Астанадағы Мем­лекеттік қызмет істері жөнін­дегі өңірлік хабты дамыту, Алма­тыдағы Көпжақты дипломатия орталығын заңнамалық түр­де рәсімдеу, «KazAid» даму­ға қолғабыс көрсету жөнін­дегі агенттігі жұмысын ілгеріле- ту, сондай-ақ, «Астана ЭКСПО-2017» халықаралық көр­­­месіне дай­ындық бойынша бар­­лық бағытта серіктестікті жал­ғастыруға қызығушылық білдірді. Г.Әбдіқалықова Қазақ­стан­ның гендерлік теңдік және әйел­дердің құқықтары мен мүм­кіндіктері аясын жүйелі түрде кеңейтіп келе жатқанын сөз етті. Ол осы орайда биылғы нау­рыз айында қазақстандық деле­га­цияның Нью-Йорктегі БҰҰ Әйелдер жағдайы жөніндегі ко­мис­сиясының 60-шы сессиясына қатысуын атады. Ал Норимаса Шимомура Қа­зақстанда көптеген маңызды реформалар жүзеге асырылып жатқанын айта келіп, еліміздің халықаралық аренада да жүйелі жұмыстар атқарып отырғанын, Пре­зиденттің былтырғы жыл­ғы қыркүйекте БҰҰ Бас Ас­сам- ­блеясында қолдауға ие бол­ған бірқатар халықаралық бас­тама көтергенін атап өтті. Мемлекеттік хатшы кездесу соңында Н.Шимомураға Қа­зақ­стан мен БҰҰ Даму бағ­дар­ламасы арасындағы үнқатысу мен өзара түсіністікті нығайту жолында атқаратын жұмыстарына табыс тіледі. Жолдыбай БАЗАР, «Егемен Қазақстан».