Ғарыш әлеміне саяхат

Ғарыш саласын меңгеріп 3 бірдей қазақ ғарышкерінің зеңгір көкке көтерілуі тәуелсіз Қазақстанның 25 жыл ішіндегі үлкен жетістіктерінің бірі. Әлбетте, ғарышкер болуды армандамайтын бала жоқ шығар? Ал, ол үшін білімді, зерек, күш-қайраты мол азамат болып өсулері қажет. Таяуда Ел Тәуелсіздігінің 25 жылдығы және Халықаралық ғарышкерлер күніне орай «Атамекен» Қазақстан картасы» этно-мемориалдық кешенінде өткен «Тәуелсіздіктің таң нұрына бөленген қанатты қазақтар» атты мәдени іс-шарада бақытты балғындар өз өнерлерімен бөлісті. Бұл маңызды шараны аталмыш кешен қызметкерлері мен Астана қалалық Райымбек батыр атындағы №50 «Қазғарыш» мектеп-лицейі бірлесіп ұйымдастырғанын айту ләзім. Мерекелік шараның шымыл­дығын ашып, құттықтау сөз сөй­леген «Атамекен» Қазақстан картасы» этно-мемориалдық кеше­нінің директоры Алма Алтыбаева кішкентай өрендерге қарап: «Ға­рышқа кез келген адамды ұшыра бермейді. Сол үшін сабақты жақсы оқып, тәртіпті бала болыңдар. Тоқтар, Талғат, Айдын ағаларың сияқ­ты, Қазақстанның бетке ұс­тар батыр, қаһарман азаматтары болу­ларыңа тілектеспіз», – деді ағынан жарылып. Сонымен қоса, жас өркендер ал­­дында физика-математика ғылымдарының кандидаты, Л.Н.Гу­милев атындағы Еуразия ұлт­тық уни­верситеті «Ғарыштық техника және технологиялар» кафедрасының доценті Әбдіқұл Ашуров, «Астана мәдениеті», «ИКОМ Қазақстан» журналдарының бас редакторы Қуандық Шамахайұлы, Райымбек батыр атындағы №50 «Қазғарыш» мектеп-лицейі директорының тәр­бие ісі жөніндегі орынбасары Нұ­раш Искакова және басқалар ға­рыш­қа қатысты ғибратты әңгімелер айтты. Сондай-ақ, тақырып шеңберінде «Не себепті ғарыш айлағы Байқо­ңырға салынған?», «Ғарыш алаңын салу үшін қандай шарттарды негізге алу керек?», «Ғарыш қандай әлем?» деген сынды қызықты сауал­­дар бала қиялындағы шабытты кеңістік әлеміне ұштап, шарықтатып жібергендей болды. Шарада Байқоңыр ғарыш айлағы мен қазақ ғарышкерлері туралы бейнетаспалар көрсетіліп, слайдтар қорғалды. Ғарышкерлер күніне орай көрме де ұйымдастырылған екен. Өнерлі өрендер осы тақы­рыпқа сай өз шығармаларын ұсы­нып, патриоттық тақырыпта әндер шырқады. Жиын соңында осы іс-шараға бел­сене атсалысқан оқушылар арнайы Алғыс хаттармен марапатталды. Раушан ТӘУІРХАНҚЫЗЫ, «Егемен Қазақстан». Суретті түсірген Орынбай БАЛМҰРАТ.

Қазақтың ғарышкерлері

Әні: Қ.Мақановтікі Сөзі: Е.Тілепбердінікі   Қазақтың батыр ұлдары, Арқалап Елдің сенімін, Ғарышқа тылсым зырлады, Бәйгеге тігіп өмірін.   Қайырмасы: Тәуелсіз елден, Көк тулы төрден, Бетке алып жұлдыз, ай, күнін, Елбасы, ел боп, Батасы көл боп, Асырған елдің айбынын! Қуат ап жерден, Тылсымды жеңген, Тоқтар мен Талғат, Айдыным!   Мәңгілік елдің тірегі, Сендерге тартсын ұландар. Алаштың алтын жүрегін, Қорғасын қайсар қырандар!   Байқоңыр байтақ даламыз, Ұшырған айға ер сендер. Торғайдан құшақ жаямыз, Ғарышты шарлап келсеңдер.