Күн тәртібінде – қауіпсіздік мәселесі

13-14 сәуір күндері Өзбекстанның астанасы – Ташкент қаласында Шанхай ынтымақтастық ұйымына мүше мем­лекеттер Қауіпсіздік кеңестері хатшыларының 11-ші кезде­суі болып өтті. Кездесуге Президенттің көмекшісі – Қауіп­сіздік Кеңесінің хатшысы Нұрлан Ермекбаев қатысты. ШЫҰ кеңістігінде қауіпсіздік саласындағы жағдай туралы пікір алмасулар өтіп, терроризммен, сепаратизммен және экстремизммен, қару-жарақ пен есірткінің заңсыз айналымымен күресте өзара іс-қимылдарды жетілдірудің тетіктері, трансшекаралық ұйымдасқан қылмыспен күрес жайы жан-жақты талқыланды. Қазақстан делегациясының басшысы кездесуге қаты­сушы­ларды біздің мемлекетіміз тарапы­нан ШЫҰ желісі бойынша атал­ған бағыттарда қабылданып жат­қан шаралар, сондай-ақ, Шан­хай ынтымақтастық ұйымына мүше мемлекеттермен екіжақты ық­пал­дастық шеңберінде қабылданып жат­қан іс-шаралар туралы құлағ­дар етті. Делегациялар басшылары Өз­бекстан Республикасының Пре­зиденті Ислам Кәрімов тарапынан қабылдауда болды. Сондай-ақ, Ташкентте Н.Ер­мек­баевтың Өзбекстан Респуб­ли­касы Президентінің жанындағы Қа­уіпсіздік кеңесінің хатшысы В.Махмұдовпен, Қытай Халық Республикасы Мемлекеттік кеңе­сінің мүшесі – Қытайдың Қоғам­дық қауіпсіздік министрі Го Шэн­кунмен келіс­сөздері өтті. Аталған кездесулер барысында тараптар қауіпсіздік са­ласын­дағы өзара іс-қи­мыл­дың нақты мәселелерін талқы­лады. Қауіпсіздік кеңесі хатшы­лары­ның кездесуінде үстіміздегі жыл­дың 23-24 маусымында Ташкент қа­ласында болатын ШЫҰ-ға мүше мемлекеттер басшылары кеңесінің мәжілісіне материалдар дайындау мәселесіне ерекше назар аударылды. «Егемен-ақпарат»