Атырау кабелі

Оған сұраныс жоғары Былтыр Атыраудағы «ПКФ Континент Ко ЛТД» серіктестігі талшықты-оптикалық кабель шыға­ратын өндірісті іске қосқан еді. Мұнайлы өңірде ал­ғаш қолға алынған жо­ба­ны «Бизнестің жол кар­тасы-2020» бағ­дар­ламасы аясында іске асыруға бет бұрған «ПКФ Континент Ко ЛТД» ЖШС бас дирек­то­ры Семен Хванның айтуын­ша, басты мақсат – телекоммуникация, көлік, құрылыс және мұнай-газ саласына қажетті талшық­ты-оптикалық кабель шы­ғару өндірісін игеру. Жаңа жоба құны – 715 мил­лион теңге. Зауытқа жалпы құны 1 мил­­лионнан аса АҚШ долларын құрайтын Қытайдан сатып алын­ған жаңа технология орнатылып­ты. «Біз ондаған миллион долларға бағаланған еуропалық технология­ны сатып алу тәуекеліне барған жоқ­­пыз. Өйткені, бұл сала­да жұ­мысымызды енді бастап отырмыз. Дегенмен, біздің зауыт­тағы қытайлық технология­мен 5 жыл бойы үздіксіз өнім шы­ғары­латынына толық сенім­діміз. Мұнда ең бастысы, шикізаттың сапа­лығы, өнім де соған сәйкес болады. Дәл осылай деуімізге Еуропа елдерінің, АҚШ және Жапонияның шикізаттарын қолданатынымыз дәлел бола алады», деген бас директор С.Хванның пікірінше, қазір мұнда жергілікті мамандар жұмысқа қабылдануда. Зауыттың қуаты – жылына бір ауысыммен 4 500 шақырымдық, ал үш ауысыммен 11 000 шақырымға созылатын оптикалық кабель шығару. Сонымен бірге, мұнда 2017 жылы мыс қосылған кабель шығаратын қосымша екі цехты іске қосу жоспары бар. Жаңа кәсіпорын тыныс-тіршілігі туралы әңгімелеген серіктестіктің бас директоры Семен Хванның айтуынша, біздің елімізде мұндай өнімге сұраныс өте жоғары. Жаңа өнімнің негізгі тұтынушысы «Қазақтелеком» АҚ болары дау­сыз. Осы компаниямен 3 мил­лиар­д теңгеден астам қаржыға екі жыл­дық келісім жасалыпты. – Біз бұдан өзге телеком­муникация және құры­лыс индустриясындағы ком­пания­ларға да өнімімізді ұсыну­ды ойластырып отырмыз. Өйткені, біздің өнімімізге сұраныс бар. Олай дейтінім, кабельдің де қолдануға болатын шектеулі мерзімі бар, оны белгілі бір уақыттан кейін ауыстыру қажет. Оған қоса қазіргі уақытта интернет, байланыс, жылдамдық секілді жаңаша талапқа сай мыс қосылған кабельдерді талшықты-оптикалық түріне алмастыру кезеңі келді, – деді серіктестіктің бас директоры С.Хван. Оның мәлім еткеніндей, жаңа өніммен еліміздегі сұраныстың 25-30 пайызын қамтамасыз ету жоспарланыпты. Мұның да өзіндік себебі бар. «Біріншіден, Атыраудағы зауытта шығарылған кабель түрлерінің өзіндік құны Ресейдегі өндірушілердікінен ерекшеленбейді. Екіншіден, зауыттың өз электр энергиясы бар. Үшіншіден, еліміздегі салық жүйесі Ресейдегіден әлдеқайда көңілге қонымды. Демек, біз олармен бәсекелес бола аламыз. Тіпті, бізде Қытайдағы кабель өндірушілермен де бәсекелес болатындай мол мүмкіндігіміз бар» деп есептейтін кәсіпорын басшысы тұрақты жұмысқа тек жергілікті 50 адам тартылғанын айтады. Сол себептен, Атырау политехникалық колледжімен дуал­­ды оқыту әдісін қолдану үшін меморандумға қол қойылды. Жолдасбек ШӨПЕҒҰЛ, «Егемен Қазақстан»