Ағылшын тілі – әлемнің кілті

Елбасымыздың үш тұғырлы тіл туралы айтқан тұжырымы елдің көңілінен шы­ғып, зор қолдауға ие болуда. Әрине, ел болған соң телі мен тентегі, дұрыс бағдарлама екендігін біліп тұрып басы жерге жеткенше өршеленіп қарсы тұратын, өнбес дауды қуатын даукес, елді әдейі адастырмақ ниет­тегі адамдар да болады. Олардың дәлелі негізсіз деп санай­мын. Менің ұғымымда, ағылшын тілін білу әлемнің тілін білу деп түсінемін. Біз спортшымыз. Елбасымыз үлкен спорт туралы терең мағыналы сөз айтады. «Шетелде Қазақстан Туы екі жағдайда, Мемлекет басшысының және халық­аралық сында жеңіске жеткен спортшының құрметі үшін көтеріледі», дейді. Бұл біздің жауапкершілігімізді арттырады, шеберлігімізді ұш­тайды,  жеңіске жетуге деген құштарлығымызды жігерлендіреді. Биыл Оңтүстік Қазақстан облы­сының Рио де Жанейрода өтетін Олимпиада жолдамасынан қор­жыны тоқ. Алтын жүлдеге таласатын үкілі үміттеріміз де бар. Спорт саңлақтарын жігерлендіру, қиын жағдайда септесу үшін халықаралық жарыстарға көбірек жолымыз түсіп жүр. Сонда өз ана тіліңнен бөлек, орыс және ағылшын тілі міндетті түрде керектігі байқалады. Кешегі одақтас он бес мемлекет, Тәуелсіз Мемлекеттер Достастығы елдерінің бір-бірімен ұғынысатын тілі – орыс тілі. Татар түбі бір түркі жұрты дегеніңмен, Қап тауының азаматтарымен, чешен, авар, қа­ра­шай-шеркес немесе Саха, Тыва тілінде сөйлесе алмайсың. Сені олармен жақындастыратын спорттағы тіл – орыс тілі. Орыс тілін білуіңнің арқасында түсінісіп, көбімен тонның ішкі бауындай жақындасып кетесің. Ал, ағылшын тілін білмесең, қапқа сал­ған балықтайсың. Қазір әлемде моңғол спорт­шыларының бәсі бөлек. Экономикасы, әлеуеті бізден төмен деп іштей тең көрмейтін шығармыз, қызығы сол, сол моңғол спортшылары ағыл­шын тілінде бұлбұлдай сай­райды. Өмірлік қажеттілік екендігін мемлекет басшылары біліп, ол тілді балабақша, мектеп бағдарламасына қосқан. Бүкіл өркениеттің кілті ағыл­шын тіліндегі оқулықтарда десек, бұл тілді қазақ халқы үшін де жақсы білудің маңызы зор. Мемлекет басшысы Нұрсұлтан Әбішұлы Назарбаевтың қазақтың баласы өркениет игілігіне қол созсын, білімді жұрттың қатарында болсын деген ниетін бәріміз біліп, орындалуына атсалысуымыз керек. Қазақстандағы білікті ұстаз, ғалым, психологтар халықаралық ағылшын, орыс тілдерін бала­бақшадан бастап оқытудың тиімді екендігін айтады. Себебі, ақыл-ойы тұнық, айтқанды лезде қағып алатын бүлдіршіндер тілді тез игеріп кетеді екен. Бүгінгі жастар – қабілетті, алдағы болашағына алаң­дайтындығымен ерекшеленеді. Олар мектеп, жоғары оқу орын­дарынан бөлек, ағылшын ті­лін арнайы курстарда оқып, болашағының баспалдағын өз күшімен қалап жатыр. Яғни, көп тіл білу қажеттілік, өзіңе пайдасынан басқа зияны жоқ.  Әлібек Нұртаев, Оңтүстік Қазақстан облыстық дене­шынықтыру және спорт басқармасының басшысы ШЫМКЕНТ