Халықтар достығына қылау түспесін

Төрткіл дүние ұлтаралық қақтығыстардан қансырап, мыңдаған адамдар туған жерінен айырылып, босып жүрген қазіргі жағдайда халықтар арасындағы түсіністік пен достықты нығайту – қай елдің де болсын кезек күттірмес міндеті. Қазақстан Тәуелсіздік алған алғашқы күннен бастап оның Көшбасшысы – Елбасы Нұрсұлтан Назарбаев қазақ жерін мекендеген этностардың достығына қылау түсірмеу мақсатында қол­дан кел­геннің бәрін жасап келеді. Бұл ретте Тұңғыш Пре­зидентіміздің басты саясаты қоғамдық этностардың толықтай құқығы мен бостандығын сақтай отырып, жергілікті, байырғы ұлтқа негізделген жоғары әлеуетті қоғам құру болды. Осындай уақыт тамырын тап басатын көрегендік саясаттың нәтижесінде 1995 жыл­дың наурыз айында Қазақстан Республикасының Президенті жанынан халық бірлігін нығайтудың тірегі ретіндегі консультативтік кеңесші орган – Қазақстан халқы Ассамблеясы құрылған болатын. Сол жылдан бастап Ассамблея этносаралық қатынастар саласында мемлекеттік ұлттық саясатты жүзеге асырудың маңызды институты ретінде танылып, елімізді мекендейтін барлық этностарды біріктіретін тиімді орталыққа айналды. Оған сол алғашқы күннен Ақ­мола облысында жұмыс істеп келе жатқан Қазақстан халқы Ассамблеясының жұмысы айқын дәлел бола алады. Қазақстан халқы Ассамблеясының жылы айдарымен өткен былтырғы жылы облысымызда халықтар бірлігін паш етіп, қазақстандық достықты нығайта беруге бағытталған ке­шенді шаралар өткізілді. Осы жылы өткізілген мегажобаның шымылдығы «Ассамблея – бір­лікке бас­тайтын жол» шарасымен ашылды. Осы шара аясында өмірге келген «Достық кітабына» мың­даған ақмолалықтар өздерінің қолтаңбасын қойды. Бейбітшілік пен келі­сім, ха­лықтар арасын­дағы шынайы дос­тық ешқашан да өзінің ма­ңы­зын жоймақ емес. Еліміздің осы бір шынайы жетістігіне шаң жұқтырмау мақсатында «Қазақ тілі мен мәдениеті» облыстық бірлес­тігі де қолдан келген игі шара­лардың бәрін атқаруда. Осы қоғамдық бірлестіктің бастамасымен облысымызда соңғы жылы 4 ірі жоба іс жүзіне асырылды. Атап айтар болсақ, «Қаныш Сәтбаев – ХХ ғасырдың ғұлама ғалымы», «Рамазан Елебаевтың елі», «Алтын сақа», «Алтын адам» атты бұқаралық шаралар идеялық тартымдылығымен жұртшылық көңілінен шықты. Осы бұқаралық мәдени істердің басы-қасында ақмолалық жастардың ұйытқы болып жүргені қуантады. 2014 жылдың тамыз айынан бері қоғамдық бірлестік жанынан «Көкше дидары» атты қазақ және орыс тілдеріндегі газет шығарылып келеді. Бұл басылым бетінде мемлекеттік тілдің халықтар бірлігін нығайтудағы ерекше рөлі лайықты насихатталады. Сонымен бірге, газет облысымызды мекен ететін ұлттар мен ұлыстардың тарихын, мәдениетін және дәстүрін насихаттауда ық­палды жұмыс жүргізіп келеді. Облыстық «Қазақ тілі мен мәдениеті» қоғамдық бірлес­тігінің тағы бір нә­тижелі жұмы­сы қала кө­шелеріндегі жарнамалар мен ғимараттардың маң­дай­шаларындағы мем­­лекеттік тілдегі жазулардың сау­атты әрі дұрыс жазылуына б­қылау жасау болып табылады. Жасыратыны жоқ, бизнес өкілдері мен мемлекеттік шенеуніктер жарнамалар мен маңдайшалардағы жазудың мемл­екеттік тілде дұрыс болуына жете мән бере бермейді. Бірлестік атқаратын тағы бір ауқымды жұмыс – қала көшелерінің атауын ретке келтіру. Бүгінде облысымыздың елді мекендеріндегі 2489 көше қазақша атауға ие болған. Мәселен, облыс орталығында соңғы жылдары Красная атты көше Әлімжан Баймұхановтың, Северная көшесі Сәкен Жүнісовтің есімін алды. Осы ретте, облысымыздағы этно­қо­ғамдық бірлестіктердің жұмы­сына облыс әкімі Сергей Кулагиннің тарапынан шынайы қамқорлық жасалатынын атап айту керек. Ол Ақмола облыстық Қазақстан халқы Ассамблеясының төрағасы ретінде этноқоғамдық бірлестіктердің жұ­мысын ба­қылап, реті келгенде бағдар беріп отырады. Облыстық ҚХА төрағасының қатысуымен өткен облыстық этномәдени бірлес­тіктердің кезекті отырысында Сер­гей Кулагин Қазақ­стан халқы Ассам­блеясы атынан Степногор қала­сындағы Достық үйінің директоры Га­лина Мариничеваға және осы жолдардың авторына Қазақстан халқы Ассамблеясының Алтын медалін тапсырды. Сонымен бірге, осы отырыс­та бірнеше адамға Қазақстан халқы Ассамблеясы мүшесінің куәлігі тапсырылды. Облыс аумағында этномәдени қоғамдық бірлестіктердің жұмы­сын жандандыра отырып, этностар арасындағы түсіністік пен дос­тықты нығайта беру мақ­сатындағы бағдарлар белгіленді. Мейрамбек КИІКОВ, Ақмола облыстық «Қазақ тілі мен мәдениеті» қоғамдық бірлестігінің төрағасы, Қазақстан халқы Ассамблеясының мүшесі