Қостанайда «Мәңгі тірі полк» құрылмақшы

ҚОСТАНАЙ. 21 сәуір. Қостанай облысында 1941-1945 жылдары Ұлы Отан соғысында халқымыздың көрсеткен ерлігіне, майдан даласында қалған, жаралы болып келіп, соғыстан кейінгі жылдары қайтқан жауынгерлер рухына тағзым ету мақсатында «Мәңгі тірі полк» құрылады. Бұл туралы Қостанай қалалық әкімдігінің баспасөз қызметіне сілтеме жасаған egemen.kz тілшісі хабарлады. Ұлы Отан соғысына қатысқан, майдан даласында қаза тапқан және бүгінде дүниеден өткен соғыс ардагерлерінің ұрпақтары аталарының, әжелерінің портреті салынған штендер дайындап жатыр. Олар 9 мамыр Жеңіс күні таңертеңгі сағат 9.00-дан «Мәңгі тірі полк» Қостанай қаласындағы орталық алаңынан Жеңіс саябағына дейін көшелермен жүріп өтеді. Бұл ерлікке тағзымның, Отанға сүйіспеншіліктің, имандылықтың көрінісі болмақ. Одан әрі қарай Жеңіс күні салтанаты аталған саябақтағы әңгілік от пен даңқ мемориалына гүл шоқтарын қоюмен жалғасады. «Мәңгі тірі полк» құруды осыдан бірнеше жыл бұрын «Нұр Отан» партиясының облыстық филиалы бастаған болатын. Олар осы жақсы дәстүрді биыл да жалғастырады. Нәзира Жәрімбетова. Дерек, фото: Қостанай қалалық әкімдігінің баспасөз қызметі.