Белгілі кәсіпкерге Қазақстаннан шығуға тыйым салынды

ҚОСТАНАЙ. 21 сәуір. Қостанайда кәсіпкер, «Иволго-холдинг» жауапкершілігі шектеулі серіктестігінің директоры, олигарх Василий Розиновтың жеке шотына және Қазақстаннан тыс жерге шығуына тыйым салынды. Бұл туралы ng.kz-ге сілтеме жасаған egemen.kz тілшісі хабарлады. Қостанай қалалық соты «Иволга-холдинг» компаниясынан Еуразиялық банктің пайдасына 3000 мың доллар өндіруге үкім шығарғаннан кейін Василий Розиновтың жеке шоты мен өзінің сыртқа шығуына тыйым салынды. 2014 жылы компания Еуразиялық банктен 80 миллион доллар заем алады, бірақ негізгі қарызды уақытысында төлемейді. Қыркүйек айында оның көлемі 50 миллион доллар, үстемесі 7 миллион долларды құрады. Оның сыртында тұрақсыздық айыбы 27 миллион доллар, шығынды орнына келтіру 26 миллион доллардан асып түсті. Мұнымен қоса соттың өзіне төлейтін баж салығы тағы бар. Қарызға белшесінен батып, банкрот болып жатқан «Иволга-Холдинг» 2015 жылы Ресейдегі ең ірі латифундист саналды. Оның иелігінде 550 000 гектар жер болды. «Иволганың» 2010 жылғы қуаңшылықтан кейін шаруасы шайқала бастады, ол қазақстандық бизнесін ресейлік бизнес есебінен қаржыландыруға мәжбүр болды. Алайда, бұл нәтиже берген жоқ, жұрдай қылып, тақырға отырғызды. Василий Розинов қазақстандық ең ықпалды кәсіпкерлердің бірі болды. Forbes журналының мәліметінше, ол 2015 жылы байлығы жөнінен 41 орын алды. 2015 жылы оның байлығы 329 миллион доллар болып есептелген. Нәзира Жәрімбетова. Дерек, фото: ng.kz.