Ынтымақтастық өрісі кеңеюде

Кеше Сыртқы істер министрі Ерлан Ыдырысов Испания сыртқы саясат ведомствосының басшысы Хосе Мануэль Гарсия-Маргальомен кездесті. Кездесуде екіжақты сауда-экономикалық және инвестициялық ынтымақтастықты нығайту мәселелері сөз болды. Кездесуден кейін министрлер баспасөз мәслихатын өт­кізіп, БАҚ өкілдеріне екі мемлекет арасындағы өзара ынтымақтастықтың жоғары деңгейде дамып келе жатқанын айтып берді. «Испания Қазақстанның сауда-экономикалық және ин­вестициялық саладағы ірі серіктесі болып табылады. Дағдарысқа дейінгі жылдарда аталған мемлекетпен сауда-саттығымыз 3 млрд. долларға дейін жетті. Бұл – ауыз толтырып айтарлықтай көрсет­кіш. Алдағы уақытта да достық және іскерлік қарым-қатынасты одан әрі дамытуға мүмкіндік мол. Бүгінгі кездесуімізді со­ның бір сатысы десек, артық айтқандық емес. Сондай-ақ, Испания Қазақстанның БҰҰ Қауіпсіздік Кеңесінің тұрақты емес мүшелігіне өту ұмтылысын қолдайтынын ерекше атап өткен жөн», – деді Е.Ыдырысов. Сонымен қатар, министр Қазақстан Президенті Нұрсұлтан Назарбаевтың Испания королі IV Филиппті ЭКСПО-2017 ха­лықаралық көрмесі аясында елімізге ресми сапар жасауға шақыруы туралы сөз етіп: «Біз Мемлекет басшысының атынан Испания короліне жіберілген шақыруын нақтыладық. Аталған сапар 2017 жылы Астанада өтетін ЭКСПО көрмесі кезінде жүзеге асады деген үміттеміз», – деді. Одан бөлек, ведомство басшысы Испанияның көлік логис­тикасы, ауыл шаруашылығы, машина жасау, қайта өңдеу, инновация, жасыл технология және телекоммуникация салаларында мол тәжірибесі бар екенін айтып, Қазақстанның осы бағыттар бойынша ынтымақтастықты нығайтуға мүдделі екенін жет­кізді. Е.Ыдырысовтың айтуынша, Испания Сыртқы істер министрінің ресми сапары аясында өткен Қазақстан-Испания бизнес-форумында аталған бағыттарға басымдық берілмек. Сондай-ақ, кездесуде екі­жақты құжатқа қол қойылып, «Жасыл көпір» серіктестік бағдарламасы бекітілді. Аталған құжатқа Х.Гарсия-Маргальомен қатар, Қазақстан тарапынан Энергетика министрі Қанат Бозым­баев қол қойды. Өз кезегінде, Х.Гарсия-Маргальо бұл бағдарламаның маңыздылығына тоқталды. «Біз бүгін екі тараптың бай­ла­нысына жаңаша серпін беретін құжатқа қол қойдық. Бұл тың бастамаға Қазақстан жа­ғының мұрындық болғанын атап өткім келеді. Сіздер үшін инфрақұрылым, қуат көзі, су ресурстары және туризм салаларында испаниялық кәсіпорындар үлкен рөлге ие. Ал біздер үшін Қазақстан Орталық Азиядағы ең жақын серіктесіміз», – деген Х.Гарсия-Маргальо испаниялық кәсіпкерлердің 17 млн. тұтыну­шысы бар Қазақстанда өз істерін жүргізуге қызығушылық танытып отырғанына назар аударды. Айта кетейік, аталған биз­нес-форумға Испания тарапы­нан 20-дан астам компания қатысса, қазақстандық бизнес-делегацияның құрамында 90 компания болды. Олар авиация, әскери техника, мұнай-газ, технологиялар трансферті және мемлекеттік-жекеменшік әріптестік, сондай-ақ, тағы басқа салалар бойынша ынтымақтасу мәселелерін қарастырды. Еламан ҚОҢЫР, «Егемен Қазақстан»