Манифестің мәтіні табыс етілді

Сенат Төрағасы Қасым-Жомарт Тоқаев бастаған Қазақ­стан делегациясы Біріккен Ұлт­тар Ұйымы Өркениеттер альянсы VII жаһандық форумына қатысу үшін Бакуге жұмыс бабындағы сапармен барды. Сапар аясында Сенат Төрағасы Әзербайжан Пре­зиденті Ильхам Әлиевпен кез­десті. Қ.Тоқаев Қазақстан Президенті Нұрсұлтан Назарбаевтың ізгі тілектестігін табыс етті. Төраға Әзер­байжан басшысын БҰҰ Өркениеттер альянсы «Инклюзивті қоғамдарда қатар өмір сүру: қатер мен мақсат» тақырыбындағы жаһандық фору­мын өткізуімен құттықтады. Сенат Төрағасы Әзербайжан басшысына Н.Назарбаевтың қарулы қақ­тығыстар мен соғыстарды түбірінен жоюды толық қамтитын бағдарлама әзірлеу ұсынылған «Әлем. ХХІ ғасыр» манифесінің мәтінін табыс етті. Президент И.Әлиев форумға жоғары деңгейде қатысқаны үшін қазақстандық делегацияға алғысын білдірді және Қазақстан мен Әзербайжан арасындағы өзара достық қатынастарды одан әрі нығайту жайында айтты. Ол Әзербайжанда көрнекті мемлекет қайраткері саналатын Президент Н.Назарбаевқа ізгі тілектестігін жолдады, деп хабарлады Қазақстан Республикасы Парламенті Сенатының баспасөз қызметі.