22 Қаңтар, 2011

«Виртуалды музей» – Тәуелсіздік жылнамасы

655 рет
көрсетілді
3 мин
оқу үшін
Қостанайда «Виртуалдық му­зей­дің» ашылу салтанаты болды. Бұл республикалық «Тәуелсіздік жетістіктері» акциясының шең­бе­рінде облыстағы қолға алынған алғашқы жоба болып табылады. Оны «Нұр Отан» ХДП Қостанай облыстық филиалының «Жас от­ан» жастар қанатының мүшелері ойлап тапты. «Виртуалды музей» «Нұр Отан» ХДП Қостанай об­лыстық филиалы сайтынан бір бет болып ашылады. Ол «Менің жетістіктерім», «Отбасымның жетістіктері», «Аудан мен қаланың жетістіктері», «Ел жетістіктері» бө­лімдерінен тұрады. Қостанай­лық­тар осы бөлімнің әрқай­сы­сына эко­номика, әлеуметтік сала, мәде­ниет сияқты өмірдің сан-са­ласы туралы материалдарды жа­зып оты­рады. Жасотандықтар интер­неттің барлығына бірдей қол­жетімді әрі мүмкіндігінің мол­ды­ғын ескеріп, осындай істі бастады. – «Нұр Отанның» Қостанай облыстық филиалының сайтынан ашылған бұл бөлімде әр қос­та­найлық өзі және өзінің туған жеріндегі, отбасы немесе жалпы еліміздегі жетістіктер, қолға алынып жатқан керемет істер туралы ой­ларын, пікірлерін жазып са­луы­на, суреттер орналастыруға мүм­кін­дік жасалды. Мұны біз, жас­отандықтар, тәуелсіз еліміздің қаз тұруы мен нық қадамдарына қа­рапайым адамдардың көзімен қа­рау және еліміздің 20 жылдық та­рихының жылнамасына қосылған үлес деп түсініп отырмыз,–дейді партияның Қостанай облыстық филиалы жастар қанатының мү­шесі Руслан Смайылов. «Виртуалды музейді» оның ашы­луына жиналған студент жас­тар жыл басының жағымды жаңа­лығы деп білді. – 20 жыл Қазақстан сияқты жас мемлекет үшін аз уақыт емес. Соған орай өзгерістер де көп. Тәуелсіздігімізді алып келген 90-шы жылдардың қиындықтарын әлі ешкім ұмыта қойған жоқ. Ол әр адамның тағдыры, әр адамның ерлігі деуге боларлық. Ал сол қарапайым адамдар жасаған ерлік істерді жеткілікті айта алдық па? Ондай адамдар арамызда еленбей жүріп жатыр, солар туралы неге айтпасқа?! Аудандар мен қалалар, облысымыз, еліміз жеке адамдардан және олар тындырған істерден тұратындығын бағалауымыз керек. Сонда Тәуелсіздігіміз де баянды болады, – деді облыстағы жастар мен балалар ұйымда­ры­ның қауымдастығы төрағасының орынбасары Гүлмира Қапенова. Ал А.Байтұрсынов атындағы университеттің профессоры Дмитрий Легкий бұл бастаманың аса құнды екенін айтып өтті. Еліміздегі бүгінгі саяси, экономикалық, әлеуметтік өзгерістердің барлығы да ертеңгі тарих екенін айтқан ол, Қазақстанның, облыстың шекаралас елдермен қарым-қатынасы ту­ралы материалдар да осы музейден орын алуы керектігін ескертті. Профессордың сөзі құрғақ шық­пады. Ол Орынбор қала­сын­да ұлттық мемлекеттігіміздің қа­лыптасу тарихында маңызды ор­ын алатын жалпықазақтық алғаш­қы екі съезд бен Алаш ардақтысы, ұлт көсемі Ахмет Байтұрсыновқа жыл аяғында орнатылған ескерткіш тақталар суреттерін және өзі осы сапарында Орынбор архивінен тапқан Байтұрсыновқа қатыс­ты тарихи құжаттардың электрон­ды көшірмелерін сыйға тартты. Бұл «Виртуалды музейдің» ал­ғаш­қы материалдарының бірі бо­лып саналады. Жасотандықтар му­зей-сайттың қызықты мате­ри­ал­дармен күн сайын толыға тү­серіне сенімді. Нәзира ЖӘРІМБЕТОВА. Қостанай.