Министрдің есепті кездесуі

Л.Н.Гумилев атындағы Еуразия ұлттық университетінде Білім және ғылым министрі Ерлан Сағадиевтің жұртшылық өкілдерімен есепті кездесуі өтті. Кездесу барысында министр білім беру саласында кең жолақ­ты интернетті енгізудің оңтайлы қадамдарына тоқтала келе, биыл оған 2,5 мың мектеп қосылатынын, тағы 1,5 мыңы алдағы үш жылда қамтылатындығын айтты. Ал 2020 жылға қарай оқушылардың 90, педагогтардың да 90 пайызын және ЖОО студенттерінің 100 пайызын қамту жоспарланға­нын, болашақта интернет біздің білім беру инфрақұрылымының негізгі тұғыр-тиянағы болатынын жеткізді. Министрдің айтуынша, биыл­ғы оқу жылынан  бастап 1 сы­нып­тар жаңартылған білім беру бағдарламасына көшпек. Ол үшін жаз мезгілінде 73 мың мұғал­ім арнайы оқудан өтеді. Өз кезе­гін­де ол: «Жаңартылған білім бағ­дар­ламасы бес күндікке көшіп, пән­дер­дің санын қысқартуға мүм­­кін­дік береді. Атап өтсем, жо­ға­ры сыныптарда 18-19-дан 13-14-ке дейін қысқарады. Бұл оқу­шылар үшін де, ұстаздар үшін де қо­лайлы. Бұл жұмыс биыл ат­қа­рылмайды, сыныптардың жаңар­тыл­ған оқу бағдарламасына көшуі­не орай кезең-кезеңімен жү­зе­ге асырылады», деді Ерлан Сағадиев. Аталған жаңартылған оқу бағдарламасын бүгінде 100-ден астам мектеп енгізіп үлгеріпті. Бұл білім ошақтарында бір орынға 20 оқушы кезекте тұрғанға ұқсайды. Айта кетейік, жиын барысында арнайы ақпараттық алаң ұйымдастырылып, кездесуге еліміздің 16 аймағы қосылды. Әр облыстың тұрғындары тікелей эфирде министрге сауал қоюға мүмкіндік алды. Сөйтіп, оқу жүйесінің негізгі даму бағыттары баяндалып, көкейде жүрген  сауалдарға тиісті жауаптар беріліп, келелі кеңестер айтылды. Ерлан Сағадиевтің министр лауазымын атқару кезінде Қазақстан Республикасының білім беру жүйесіндегі страте­гия­лық маңызды құжат­тарға қол қойылды. Мемлекет басшысының Жарлығымен Білім беруді және ғылымды дамытудың 2016-2019 жылдарға арналған мемлекеттік бағдарламасы бекітілді, оны іске асыру бойынша іс-шара­лар жоспары қабылданып, қолда­ныстағы мемлекеттік білім беру стандарты жаңартылды. 250-ден астам кездесулер мен тал­­қылаулар өткізілген. Соның ішінде Израиль, Ұлы­бри­­тания, Латвия, Венгрия, Ита­лия елшілерімен, ЕҚЫҰ, ЭЫДҰ елдері, Әлем Банкі, Қазақ­стандық ҮЕМ өкілдерімен, жур­налистермен және қоғам қайраткерлерімен өткізілген кездесулерді атауға болады. Раушан ТӘУІРХАНҚЫЗЫ, «Егемен Қазақстан»