Қызылорда облысында Білім және ғылым министрі Бақытжан Жұмағұлов арнайы іссапармен болды. «Бітер істің басына, жақсы келер қасына» дейді қазақ. Сол айтпақшы, Білім және ғылым министрі Қызылорда қаласының іргесінде орналасқан Қарауылтөбе ауылының оқушылары мен мұғалімдерінің қуанышына ортақтасты. Себебі, аталған ауылда 250 орындық жаңа мектептің құрылысы аяқталып, пайдалануға берілгелі тұрған. Сөйтіп, министр жаңа мектептің лентасын қиды.
А.Хангелдин атындағы мектепті ашуға келген облыс басшысы Болатбек Қуандықов мұның бәрі Елбасы Н.Назарбаевтың сындарлы саясатының, жас ұрпаққа қамқорлығының арқасында іске асып жатқан шаруа екенін баса айтты. Ал Білім және ғылым министрі мектепте жүрген болашақ ақын, әкім, министрлерді жігерлендіріп, ел келешегі үшін білімді ұрпақтың алтыннан да қымбат екенін баса көрсетіп, жан-жақты білім алуға шақырды.
Бүгінде Қызылорда облысында 170 балабақша, 123 мектеп жанындағы шағын орталық жұмыс істейді. Егер аталған сандарды 2009 жылмен салыстырсақ, онда мектепке дейін білім беретін мекемелердің 110-ға артқанын көреміз. Ал бұл – үлкен көрсеткіш.
Министр сапары барысында «Сарыарқа-ЛМ» жекеменшік балабақшасында және жақында ғана ашылған дарынды балаларға арналған №4 мектеп-интернатында болды.
Ержан БАЙТІЛЕС.
Қызылорда.