Әріптестіктің белсенді бағыттары

Жуырда «ҚазМұнайГаз» Барлау Өндіру» акционерлік қоғамының бас директоры Құрманғазы Есқазиев елімізде іссапармен жүрген Eni S.p.A компаниясының аға вице-президенті – барлау өндіру жөніндегі бас директоры Антонио Велламен кездесті. Eni S.p.А – мұнайды зерттеу, тасымалдау және игерумен, базалық май және қос­па өндірісімен, сондай-ақ, блендинг пен тауарлық майды бөлшектеп өлшеумен айналысатын әлемдегі санаулы мұнай компанияларының бірі. Дүниежүзінің 70 елінде бизнес жүргізіп отырған компанияда 76 мыңдай адам жұмыс істейді. Осындай ірі ком­панияның өкілімен кездесу екі тараптан да ресми си­пат­та өтті. Кездесуге аталмыш шетелдік компанияның Ор­талық Азия бойынша вице-президенті Даниелле Вер­торелли мен Қашаған, Қара­шығанақ жобалары жөніндегі басқарушы директоры Лука Виньятти қатысқанын атап өту қажет. Кездесу барысында Антонио Велла Құрманғазы Есқазиевты «ҚазМұнайГаз» Барлау Өндіру» АҚ бас ди­ректоры лауазымына та­­ғайындалуымен және «Қазақстан Республикасы кө­мір­сутегі әлеуетін ғылыми негіздеу» тақырыбындағы жұмыстар циклі үшін Әл-Фараби атын­дағы Мемлекеттік сыйлық – жоғары марапатын алуымен құттықтады. Әріптестер «ҚМГ» БӨ» АҚ және Eni S.p.A-ның екі­жақ­ты қарым-қатынас ынты­­мақтастығының өзара тиім­ділігі жайын, атап айт­қанда, барлау және өндіру сала­сын­дағы жаңа технологиялар, қызметкерлерді басқару және мамандар әлеуетін дамыту, сондай-ақ HR қызметі жұмыс­керлері арасында тәжі­рибе алмасу туралы мәсе­ле­лер­ді талқылады. Бұдан басқа, тараптар корпоративтік басқаруды жақсарту мәселе­лері бойынша пікір алмасты. Айта кетейік, «ҚазМұ­най­Газ» Барлау Өндіру» АҚ компаниясы был­тыр­ғы жылдың қоры­тындысы бойынша мұнай өндіру көле­мі жағынан еліміздегі көш­­­бас­­шылардың үштігі­не кірді. Дә­лі­регінде мұ­на­й­дың дәлел­денген және бол­жамды қор­ларының көлемі бірлескен кәсіп­орын­дардағы үлесті есептемегенде 2015 жылдың соңындағы жағдай бойынша 152 млн. тоннаны құрады. Марат АҚҚҰЛ, «Егемен Қазақстан»