Ақтөбе қаласында интеллектуальдық байқау өтті

АҚТӨБЕ. 4 мамыр. Қазақстан Тәуелсіздігінің 25 жылдығына орай «Қазхромда» ең үздік білімпаздар анықталды. Бұл туралы egemen.kz тілшісі хабарлады. Ақтөбедегі Металлургтер мәдениет үйінде өткен бесінші «Шанс» интеллектуалдық байқауында Ақтөбе, Қарағанды және Павлодар облыстарының бес командасы бақ сынады. «Қазхромның» филиалдары – Дөң тау-кен байыту комбинаты, «Казмарганец» кен басқармасы, Ақсу және Ақтөбе ферроқорытпа зауыттарының жас зерделілерінен бөлек, ойынға алғаш рет компанияның аппарат басқармасының өкілдері қатысты. Еуразиялық топ (ERG) құрамындағы «Қазхромның» қызметіне қатысты компанияның топ-менеджерлері жолдаған таспа-сұрақтар мен нақты ғылым, география аумағындағы сауалдар қатысушылардың ой ұшқырлығына, өнерпаздықтарынанө, білімпаздықтарына, жедел шешім қабылдауларына және командалық рухына үлкен сын болды. Ұйымдастыру комитетінің төрағасы, адам ресурстарын басқару департаментінің бастығы Венера Мұхамедзянованың айтуынша, бұл шара шығармашылық пен зияткерлік әлеуетті дамытып, дарынды жастарды анықтауға, қабілет-қарымын жетілдіру үшін ұйымдастырылып отыр. Сайыстың бес кезеңінің қорытындысы бойынша Ақтөбе ферроқорытпа зауыты ең үздік команда деп танылды.  Ақсу ферроқорытпа зауытының командасы екінші орынды, ал компанияның апппарат басқармысының командасы үшінші орынға ие болды. Өткен жылы «Қазхром» компаниясы жастардың кәсіби біліктілігін дамытуға және шеберлігін шыңдауға 41 млн.теңге астам қаражат жұмсады. Сатыбалды Сәуірбай. Дерек, фото: egemen.kz