Оралда 4 мың адам алимент төлеуден қашып жүр

ОРАЛ. 4 мамыр. Өткен жылы Орал қаласы аумағында жалпы саны 8804 құқық бұзушылық оқиғасы тіркелген. Соның ішінде алимент өндіруге қатысты 379 қылмыстық іс бойынша сот алды тексеріс жұмыстары басталды. Бұл туралы Орал қалалық прокуратураның баспасөз қызметіне сілтеме жасаған egemen.kz тілшісі хабарлады. Оның айтуынша, алимент өндіруге қатысты қозғалған қылмыстық істер санының көптігіне қарамастан, сотқа бар болғаны бір-ақ қылмыстық іс жолданыпты. Қалған істер қысқартылып, толыққанды тексеру, анықтау жүргізу мәселесі мүлде назардан тыс қалған. Нақты айтар болсақ, күні бүгін 5784 қала тұрғыны алимент төлеуші болып табылады. Соның тек 1700-і ғана ұл-қызын күтіп-бағуға жұмсалатын алимент  қаржысын өз еркімен аударып отыр. Ал төрт мыңдай азамат алимент төлеуден басын алып-қашып, сот орындаушылары мен ішкі істер органдарынан бой тасалап жүр. Көпшілігі жұмыс істейтін жерін, табысын жасыруды жөн көреді. Алимент төлеуден қашқақтайтын ата-аналардың дені тұрақты еңбек етеді, яғни сотпен шығарылған шешімді орындауға қаржылық жағынан толық қабілетті. Прокурорлық тексеріс кезінде 70 борышкердің жылжитын және жылжымайтын мүлкі бар екендігі анықталған. Бес борышкердің мүлкіне сот орындаушылар тарапынан ешқандай тыйым салу шарасы қолданылмағаны белгілі болды. Осыған орай алдағы уақытта жүйелі жұмыс жоспары бекітілді. Темір Құсайын. Дерек: Орал қалалық прокуратураның баспасөз қызметі. Фото: 7ya.ru.