Мұхтар Құл-Мұхаммед «Нұр Отан» партиясы төрағасының бірінші орынбасары болды

АСТАНА. 6 мамыр. Қазақстан Президенті Нұрсұлтан Назарбаевтың Жарлығымен «Нұр Отан» партиясы төрағасының бірінші орынбасары болып Мұхтар Құл-Мұхаммед тағайындалды. Бұл туралы inform.kz-ке сілтеме жасаған egemen.kz тілшісі хабарлады. «Нұр Отан» партиясының Саяси кеңес бюросы отырысында Мемлекет басшысы Нұрсұлтан Назарбаев партия төрағасының жаңа бірінші орынбасары Мұхтар Құл-Мұхаммедті таныстырды. Мұхтар Құл-Мұхаммед 1960 жылы туған. Қазақ мемлекеттік ұлттық университетін бітірген, заң ғылымдарының докторы, профессор. 1982 - 1992 жылдары Қазақ кеңес энциклопедиясының ғылыми редакторы, аға ғылыми редакторы, философия, құқық және социология редакциясының меңгерушісі, жауапты хатшы болып еңбек етті. 1992 - 1999 жылдары - «Атамұра» баспа корпорациясының президенті. 1999 - 2001 жылдары - Парламент Сенатының депутаты, Заң шығару және құқықтық реформа жөніндегі комитетінің хатшысы, Сенаттың әлеуметтік-мәдени даму жөніндегі комитетінің төрағасы. 2001 - 2003 жылдары - Мәдениет, ақпарат және қоғамдық келісім министрі. 2003 - 2007 жылдары - Президент кеңесшісі, Президенттің баспасөз хатшысы, Президент Әкімшілігі басшысының орынбасары. 2007 - 2008 жылдары - Қызылорда облысының әкімі. 2008 - 2010 жылдары - Мәдениет және ақпарат министрі. 2010 - 2011 жылдары - Мәдениет министрі. 2012 - 2013 жылдары - Мемлекеттік хатшысы. 2013 - 2014 жылдары - Мәдениет және ақпарат министрі. 2014 - 2015 жылдары - Президент кеңесшісі. 2015 жылдың наурызынан мамырына дейін – Нұрсұлтан Назарбаевтың кандидатурасын қолдау үшін құрылған республикалық қоғамдық штабтың басшысы. 2015 жылғы 5 мамырдан бүгінгі дейін Қазақстан Республикасы Президентінің кеңесшісі болып қызмет етті. Талғат Райымбек. Дерек: inform.kz. Фото: akorda.kz.