Үздіктер үзіліп шыға бастады

Қазіргі күндері Ресейдің Мәскеу жә­не Санкт-Пе­тер­бург қалала­рын­да өтіп жат­қан хоккейден әлем чемпионаты ірік­теу турнирі бел ортасынан ауды. Бейсенбі күні Дания құ­рамасын 10:1 етіп талқандап шыққан Ресей құрамасы енді 9 ұпаймен А тобын­дағы екі лидердің бірі болып шыға келді. Ал Норве­гияны 7:0 есебімен ойсырата жеңген Чехия ұпай санын 11-ге жеткізіп, бұрынғы пози­циясын біраз нығайта түсті. Үшінші орынға соның алдында Қазақстан құрамасын тізе бүктірген Швеция орналасты. Оның 8 ұпайы бар. Біздің жігіттерден 1-турда ұтылып қал­ған Швейцария кейін 7 ұпайға қол жеткізіп, төртінші орынға көтерілді. Бұрнағы күні Германиядан 5:2 есебімен басым түскен Канада ұпай санын 12-ге толтырып, бірінші тұғырға тұрақтады. В то­бында одан басқа финдерде де осыншама ұпай бар. Бұл екі құ­рама турнирде әзірге бірде-бір ұпай жоғалтпаған, барлық ойында негізгі уақытта жеңіске жеткен ұжым­дар болып тұр. Осы күні АҚШ Францияны 4:0 етіп жеңіп, 6 ұпаймен үшінші позицияға қадам басты. Онымен ұпай қоры бірдей Словакия келесі орында келеді. Кеше түнде 5-турдың ойындары ойналды. Қазақстан құ­рамасы Чехия командасымен бет­тесті. Бұдан басқа, АҚШ – Вен­грия, Дания – Латвия, Гер­­мания – Беларусь терме жа­ма­ғаттары өзара күш сынасты. Ал бүгін біздің жігіттер өз­де­рі­нің басты бәсекелестерінің бірі Лат­вия құрамасымен кез­де­седі. Осы ойында команданы элита тобында қалатын-қал­май­тыны белгілі бола бастайды. Тур­да та­ғы сондай-ақ Ресей – Швей­ца­­­рия, Норвегия – Швеция, Фран­­­ция – Финляндия, Венгрия – Беларусь, Канада – Словакия құрамалары ойнайды. Ертең Қазақ­стан құрамасы Дания хок­кей­шілерімен тартысқа түседі. Команданың алдағы жылғы тағдырына осы ойынның қоса­тын үлесі де аз болмақ емес. Руслан ИГІЛІК