Балмұздақ, торт, шоколад, ірімшік, йогурт

Қазір мұның бәрі бие сүтінен жасалады Алматы облысында кәсіпкер Өтеміс Махановтың шаруашылығын білмейтін адам кемде-кем. Ол бірнеше жылдан бері бие сүтінен жасалатын тағамдар дайындаумен айналысып келеді. Жақында кәсіпкер бие сүтінен балмұздақ, торт, шоколад, ірімшік, йогурт жасауды да қолға алды. Кәсіпкер бала кезінен жыл­қы байлап, бие саууға қызығып өс­кен екен. Кейін жігіт шағында жылқы шаруа­шылығымен айналыса бастаған. Ал ел ағасы жа­сына жеткен кезде жыл сайы­н мемлекеттен субсидия алып, қымыз бен шұбат өндіру­ді кә­сіпке айналдырған. Қазір іс адамы соның жемісін көріп отыр. Өзінің айтуынша, жұрт ара­сында өзі өндіретін тағамдарға қы­зығушылар көбейіп келеді. – Менің жыл сайын жаз басталысымен қымыз бен шұ­батты сату үшін базарлар мен қымызханалардың есігін тоздырған кездерім болды. Қазір де халықты қымызға үй­ретуді тоқтатқым келмейді. Жүр­ген жерімде қымыздың, шұ­бат пен саумалдың қасиетін айтып келемін, – дейді ол. – Қымыз қасиетті сусын болғандықтан, тазалықты, ашыту технологиясын жіті сақ­тауды және ыдыстың сапалы болуын қажет етеді. Қымыздың бір өзі адам дене­сінің күш-қуатын арттырады, бүйрек пен бауырды қа­нық­тырады, қан тамырларын тазалайды. Ал саумалды, яғни жаңа сауылған биенің сүтін адамдар көбіне емдік қасиеті үшін ішеді, – дейді тағы кәсіпкер. Бүгінде Өтеміс Маха­нов­тың шаруашылығынан шыққан өнімдерді зерттеу үшін шетел мамандары келеді екен. Жақында жапондар да ат ізін сала бастапты. Олар дүкен сөрелерінен бие сүтінің негізінде жасалған тағам түрлерін көріп таңғалысыпты. Олардың арасында қантсыз, консервантсыз табиғи балмұз­дақтың дәмін татып көрген. Дастан КЕНЖАЛИН, «Егемен Қазақстан»