Кеше Қазақстан Республикасының Тұңғыш Президенті – Елбасы кітапханасында «Қазақстандық біртектілік және жалпыұлттық бірлік тағылымы» тақырыбында дөңгелек үстел мәжілісі өтті.
Отырысты ашып, оның модераторлығын атқарған Қазақстан Республикасының Тұңғыш Президенті – Елбасы кітапханасы директорының орынбасары Жапсарбай Қуанышев бес институттық реформаны жүзеге асыру жөніндегі «100 нақты қадам» Ұлт Жоспарында белгіленген міндеттерді шешу аясында өзекті мәселелерді талқылау, тәжірибе алмасу бағытында былтырғы жылы бірқатар жұмыстар жүргізілгенін айта келе, алғашқы сөз кезегін ҚХА кафедралары қауымдастығының төрайымы Махаббат Қозыбаеваға берді.
«Жастардың бойына Отанға деген сүйіспеншілік, адам бойындағы асыл қасиет – патриоттық сезімді қалыптастыруда Қазақстан халқы Ассамблеясының негізгі қағидатының маңызы өте зор», деген шешен ЖОО-лар аясында құрылған ҚХА кафедралары атқарған жұмыстарды санамалап, олардың мәні мен мазмұнына тоқталып, қазақстандық біртектілікті теориялық және әдістемелік тұрғыдан зерттеудің кешенді қолға алынып жатқанын алға тартты. Ал Л.Н.Гумилев атындағы Еуразия ұлттық университеті ҚХА кафедрасының меңгерушісі, экономика ғылымдарының докторы Анатолий Башмаковтың сөзі қазақстандық біртектілікті қалыптастырудың тарихи және рухани факторы төңірегінде өрбіді.
Шешен өзінің ұстаздық қызметінде Назарбаев Университетте жиі болатынын, ондағы жастарға тәлім беруші мұғалімдердің 90 пайызының шетелдіктер екенін, олар үшін қазақстандық патриотизмнен гөрі, маман даярлап шығудың маңызды екенін айтып, не ексең, соны орасың дегендей, біздер үшін білікті маман ғана емес, Отанын жанына оттан да ыстық көретін азаматтар қатарының молаюы маңызды. Жалпы, біртектілік дегеннің ғылыми анықтамасы 30 шақты, ал менің ұғымымда әрбір қазақстандық өзінің этностық ерекшелігіне, діни сенімінің өзгешелігіне, идеологиялық көзқарасының қайшылығына қарамастан, «Мен Қазақстан азаматымын, менің Отаным – Қазақстан, оның барлық қызығы мен шыжығы, игілігі мен қателіктері де менікі» деген ойдың болмысқа дендеп енуінде деймін. Ұлтым орыс, бітімім қазаққа ұқсамай тұрса да, менің ділімнің дені қазаққа айналған. Менің отбасымның күнделікті тұрмысының қазақ отбасынан айырмашылығы аз. Соғым соймаса, қыстан шыға алмайтындай көретін қазақы болмысқа айналған, деді.
Қазақстан Президенті жанындағы Мемлекеттік басқару академиясы Орталық Азия өңіріндегі этносаралық және конфессияаралық қатынастарды зерттеу орталығының басшысы Айгүл Сәдуақасова біртектілік пен бірлікті нығайту жөніндегі мемлекеттік саясат төңірегінде ойларымен бөліссе, ғылым докторы Ғазиз Телебаев біртектіліктің қалыптасу ерекшеліктеріне қатысты пайымдарын ортаға салды. Ал аталған шараны Қазақстан Республикасының Тұңғыш Президенті – Елбасы кітапханасы Президент жанындағы «Қоғамдық келісім» РММ мен ҚХА кафедралары қауымдастығымен бірігіп өткізді.
Отырыс соңы баяндамаларды талқылауға, пікір алысуға ұласып, жиналғандар тәжірибе алмасуды өрістете түсу қажет деген тоқтаммен тарасты. Қазақстан Республикасының Тұңғыш Президенті – Елбасы кітапханасы директорының орынбасары Жапсарбай Қуанышев жиналғандарды келелі ойды жарасымымен жарыстырған, қоғамның тұтастығын басты ұстаным еткен жандардың әрбір басқосуы осылай өтуі тиіс, сіздердің бәріңізге табыс тілеймін, деп алғысын жеткізді.
Анар ТӨЛЕУХАНҚЫЗЫ,
«Егемен Қазақстан»