Шотландияның Биггар қаласында тұратын ерлі-зайыптылар ойламаған жерден олжаға кенелді. Олар кезінде 5 фунт стерлингке сатып алған ескі орындықтың көпшігінің астынан гауһар тасы бар алқа тауып алды. Зергерлер алқаның құнын 5 мың фунт стерлингке бағалап отыр.
Ерлі-зайыптылар бұл орындықты 10 жыл бұрын сатып алған екен. Оны бірнеше жыл пайдаланғаннан кейін үйлерінің шатырына шығарып тастаған. Жақында отағасы ескі жиһазды жаңа матамен қаптамақ болғанда, оның көпшігінің астынан қымбат алқа шыға келген.
Алғашында отағасы алқа туралы әйеліне айтпай, құпия сақтағысы келген екен. Бірақ қуанышы қойнына сыймай, айтып қойған. Ерлі-зайыптылар алқаны сатудан түскен ақшаға үйлеріне жаңа жиһаз, әйеліне қымбат сырға сатып алыпты.
Нұрхан АСҚАР