Алматыда 3 мың көрерменге арналып салынған «Халық Арена» мұз аренасы Дүниежүзілік қысқы Универсиаданың басты нысандарының бірінен саналады. Мұнда Студенттік ойын күндері хоккей сайыстары өтетін болады. Бұл үлкен спорт кешенін салу 2014 жылғы шілдеде басталған. Нысан құрылысын жүргізгендердің 60 пайызын қазақстандықтар құрады. Ғимарат құрылысы межеге сай тамыз айының соңында аяқталуға тиіс еді. Алайда, оның мердігері болған «Ария Жаңа Астана» ЖШС жұмысты мерзімнен 2 ай бұрын бітірді.
«Халық Арена» Алматы қаласының Медеу ауданындағы Күлжін және Талғар жолдарының қиылысында 11 гектар аумақты алып жатыр. Ғимараттың жобасын «Арх-Синтезпроект» ЖШС жасады. Жобалаушылардың айтуынша, қаланың осы жері әлсіз шөкпелі топырақтан тұрады. Сондықтан тұрақтылық үшін құрылысшылар 15 метр жоғарғы қабатты көтеріп, арнайы балластпен көмген. Нысанның іргетасы монолит темірбетоннан, жоғарғы бөлігі металл конструкциядан соғылған. Құрылыс барысында көбіне қазақстандық құрылыс материалдары, оның ішінде энергияны үнемдейтін әйнектер пайдаланылған, тек шатыр ғана Германияда өндірілген арнайы болат кәсіби жабынмен жабылған.
Ғимарат сейсмикалық жағынан тұрақты, ол 9-10 баллға есептелген және барынша дербес жұмыс жасайды. Оның жеке жылыту жайы, бірінші санаттық трансформаторлық шағын стансасы, су қоймалары бар. Аймақтағы жас көшеттер өзіндік жер асты ұңғымадан автоматты түрдегі суғарғышпен суарылады.
«Халық Арена» бас, қосалқы және әкімшілік сияқты үш блоктан тұрады. Ғимараттың негізгі ошағы болып шайбалы хоккейге арналған 61х30 метр көлеміндегі басты арена табылады. Қасында үлкен халықаралық жарыстарды өткізу үшін міндетті шарт болып табылатын, өлшемі де сондай қосалқы жаттығу аренасы орналасқан.
Кешенде спортшылардың жарысты табысты өткізулеріне барлық жағдай жасалған. Жалпы алғанда, хоккей командаларына арналған 12 киім ауыстыру бөлмесі бар, әрбір киім ауыстыру бөлмесінде медициналық массаж орны қарастырылған.
Киім ауыстыру бөлмелері жанында Дүниежүзілік допингке қарсы агенттік (WADA) талаптарына сәйкес допинг-бақылау сынамаларын алатын бөлмелер блогы орналасқан. Блок күту бөлмесінен, анализдерді қабылдау бөлмесі және зертханадан тұрады. Жеке төрешілік аймақ, конькилерді ұштауға арналған арнайы орын, жарысқа қатысушылардың спорттық формаларын кептіруге арналған орындар бар. Сонымен қатар, спортшыларға арналған қосалқы үй-жайлар кардиожаттығу құрылғылары, күш жаттығу құрылғылары және денені керуге арналған бос аймағы бар жаттығу залы қызмет көрсетеді. Сондай-ақ, екі қабатта арнайы медицина-қалыпқа келу орталығы жабдықталған. Климат-бақылаудың заманауи жүйесі жайлы 20-22˚С температураны толық қамтамасыз етеді.
Бұқаралық ақпарат құралдары үшін барлық қажетті жағдайлар жасалған. Баспасөз орталығы, баспасөз-конференцияларға арналған зал, баспасөз-бар, баспасөзге және фотографтарға арналған жұмыс бөлмелері бар. БАҚ-қа арналған аралас микс-аймақ та қарастырылған. Онда журналистер жарыстарға қатысушы-командалар өкілдерімен сұхбаттаса алады. «Халық Аренада» 4 комментатор кабинасы жабдықталған және халықаралық стандарттарға сәйкес телекөрсетілімдер үшін жағдайлар жасалған. Сымдық және сымсыз ғаламтор, бөлінген байланыс арналары бар.
Жобалаушылар аренаның көрермендер үшін барынша жайлы болуы жағын да көздеді. Кешен аумағында ыңғайлы 4 кіреберіс тұр. Жеке автокөліктер үшін 250 орындық (оның ішінде 40 орын – халықтың қимылы шектеулі тобына арналған) жерүстілік тұрақ бөлінген. Жер астылы тұрақ одан да көп көлік санын қамти алады, онда 330 көлік орны қарастырылған, 20 автобусқа арналған жеке тұрақ іске қосылған. Ғимаратта 160 отырғызу орындары бар, сондай-ақ, кафе және 150 адамды сыйдыратын екі кафе-буфет жұмыс істейді.
Мүмкіндігі шектеулі жандар үшін ерекше жағдайлар жасалған. Оларға аймақтағы кресло-арбаларға бөлінген сызықтар, пандустар, арнайы лифттер мен бас хоккей залындағы жеке орындар және тағы басқалар жатады.
Көрермендер спорт жарыстарының барлық қызықтарын, бейне қайталауларды, мәтіндік ақпаратты мұз айдынының үстінде орналасқан алып жарық-диодтық бейнелік текше экранынан көре алады. «Халық Аренаның» залы ең заманауи жарықтық-техникалық және дыбыс жабдықтарымен қамтамасыз етілген.
Жобалау сатысының өзінде осы заманауи спорт құрылымын Универсиададан кейін де пайдалану идеясы қойылған. Кешен өзінің белгілеген мақсаты бойынша көпфункционалды болып табылады. Біріншіден, мұнда хоккейден басқа ауқымды жарыстарды өткізу мүмкіндігі бар. Арена басқа да ойын және жеке спорт түрлеріне қарай өзгертіледі. Екіншіден, ең бастысы спорттық кешен балалық-жасөспірімдік спортты дамытуға, барлық қала тұрғындарын дене шынықтыруға тартуға есептелген (мысалы, қосалқы сырғанақ айдында барша ниет білдірген адамдар үшін көпшілік сырғанауды ұйымдастыру). Сондай-ақ, мұз аренасының көптеген спорттық-жаттығу залдары да өз келушілерін күтеді.
«Халық Аренада» мәдени-көріністік іс-шараларды өткізуге қарай өзгеру құбылысы қарастырылған.
Жалпы, «Халық Арена» сәулет кешені ретінде жергілікті табиғат көрінісіне сәтті үйлеседі, ол қаланы болашақта дамытудың маңызды ошағы және барлық қалаушылар үшін спортпен айналысу және демалыс орнына айналуы тиіс. Болжамдар бойынша, арена өз аумағына жыл сайын шамамен 150 000 келушіні тарта алады.
Талғат РАЙЫМБЕК,
«Егемен Қазақстан»