Конституциялық өзгерістерді Қазақстанның саяси жүйесін демократияландырудағы үлкен қадам ретінде қарастыру керек. Жалпы, осы өзгерістермен біздің саяси жүйеміздің тиімділігі, тұрақтылығы мен теңгерімділігі артатыны сөзсіз. Елбасы өзінің біраз өкілеттіктерін Парламент пен Үкіметке беріп жатыр, бірақ, бұл президенттік басқару жүйесі әлсірейді дегенді білдірмейді. Президенттік басқару жүйесі сақталады, Елбасы еліміздің дамуындағы стратегиялық және ұлттық қауіпсіздік мәселелеріне, сыртқы саясатқа басымдық беретін болады. Ал экономикалық саясатқа қатысты күнделікті мәселелер толығымен Үкіметтің қарауына өтеді. Үкімет бұл мәселелерге тиісінше өзі жауап беретін болады.
Конституцияға енгізіліп жатқан өзгерістерді бір жағынан, халықтың билікті қалыптастырудағы рөлін күшейту деп те бағамдауға болады. Өйткені, өзгерістер жүзеге асса, тиісінше, Парламенттің өкілеттілігі күшейеді. Мәселен, Парламент Үкіметті жасақтау үдерісіне де қатысатын болады. Парламент Үкіметке бақылау жасап отырса, сол арқылы халықтың билікті қалыптастыруға, екінші жағынан, бақылауға байланысты мүмкіндіктері артады деп қарастыру керек. Сондықтан, бұл өзгерістерді біздің саяси жүйемізді демократияландыру үдерісіндегі маңызды да үлкен қадам деп санаймын.
Мәулен ӘШІМБАЕВ,
Парламент Мәжілісінің Халықаралық істер, қорғаныс және қауіпсіздік комитетінің төрағасы