Ұлттық зияткерлік әлеуетін дамытуға ықпал ету, әр мұғалімнің, оқушының өзін-өзі өсіруге және шығармашылыққа ұмтылуға, жоғары өнегелі болуға, ең бастысы, тәуелсіз Отанымыздың ертеңгі тұлғалы азаматтарын қалыптастыру мақсатында құрылған бұл білім ордасы соңғы жылдары ел аумағында үлкен беделге ие болып отыр. Жаңа оқу жылында Астана, Көкшетау, Семей, Талдықорған және Өскемен қалаларында 6 бірдей Назарбаев зияткерлік мектептері оқушыларға есік ашты. Жыл аяғына дейін Орал қаласындағы білім ордасының құрылысы аяқталатын болады.
Семинарда еліміздің жалпы білім беретін мектептеріне арналған онлайн сабағы көрсетілді. Бір жыл ішінде интернет арқылы өткізілетін осындай семинар сабақтардың ұзын саны 340-ты құрайды екен. Сабаққа қатысушыларға зерттеу дағдыларын жетілдіруге, ойлауды дамытуға бағытталған практикалық және зертханалық сабақ ұсынылатын болады. Зияткерлік мектеп мұғалімдері күрделі есептерді шығару тәсілдерін ұсынса, оқушылар өздерін толғандырып жүрген сұрақтарын қойып, соған нақты жауаптар алады.
«Назарбаев зияткерлік мектептері» акционерлік қоғамының төрайымы Күләш Шәмшидинованың айтуына қарағанда, мектептегі мұғалімдердің шеберлігін жетілдіру бойынша Назарбаев университетімен бірлікте жұмыс атқарып жатыр екен. Сол білім ордасында 100 мұғалім зияткерлік мектептер үшін әзірленіп жатса, олар келесі жылы сыннан сүрінбейтін болса ғана білім ұяларына оралады. Зияткерлік мектептердің тәжірибесін тарату мақсатына келетін болсақ, бұл білім ұясын педагогикалық шеберлік орталығы деуге болады. «Біз тиісті орындарға жалпы білім беретін мектеп мұғалімдері үшін Кембридж университетінің халықаралық сынақ кеңесімен бірлескен кіші орталықтар құруды ұсынған едік. Ол Үкімет тарапынан қолдау тапқан.
Сүлеймен МӘМЕТ.