Толағай табысы бар Тобыл өңірі

Бұл алып кәсіпорын бұрынғы Қостанай дизель қозғалт­қыш­та­ры зауытының орнында 2003 жылы іргесін қалаған болатын. Содан бері еліміздегі машина жасау саласының ірі нысаны Ел­басының мұқият назарында. Оған Нұрсұлтан Әбішұлы осы жылдар ішінде бүгін үшінші рет атбасын тіреп тұр. «Президент әр келген сайын кәсіпорын биік сатыға өсіп отырды, көп іс тындырдық», дейді «АгромашХолдинг» акционерлік қоғамы директорлар кеңесінің төрағасы Дин Ким журналистермен әңгімесінде.

Расында, «АгромашХолдинг» астықты, кенді Қостанайдың даң­қын енді машина жасау ісімен алысқа апаратын болады. Мұнда қатарынан бірнеше инвести­ция­лық жобалар жүзеге асырылуда. Соның бірегейі деп Оңтүстік Ко­реяның Ssang Young жүрдек кө­лігінің Қостанайда құрасты­ры­луын айтуға болады. Президент Нұрсұлтан Назарбаев қаз-қатар тізілген Ssang Young көлігінің жа­нына келді. Бұл жобаның құны 2,4 миллиард теңгені құрайды. Ол қолға алынған аз уақыттың ішінде Ssang Young жүрдек кө­лі­гінің 600 данасы құрастырылып, тіпті сатылып та үлгерді. Бүгінге дейін Қостанайдан бұл маши­на­ның 5 түрі шығарылады. Оның «Nomad» маркасы жақын шетелдерге экспортталады. Жыл ая­ғы­на дейін марканың әкелінуіне байланысты құрастырудың жаңа желісі іске қосылады. Соның арқасында жыл сайын көлік саны еселеп артатын болады. Мысалы, биыл қостанайлық Ssang Young көлігінің 1500 дана­сы сапқа тұратын болса, 2015 жылы бұл көрсеткіш 7500-ге жетеді деп болжануда. Қазақ­стан­дық­тар сәні де, сапасы да келіскен жүрдек көліктерді енді шекара аспай-ақ Қостанайдан алып мінетін уақыт алыс емес. Бұл цехта 35 қостанайлық үстіне қы­лау жұқтырмай, халатпен жүріп жұмыс істейді. Агромашхолдингтіктер корея­лық көлікті шығарғанда, оған қа­зақстандық мазмұн беруге ерекше көңіл бөліп отыр. Жақын уа­қыт­та Ssang Young жүрдек ма­шинасының қауы (кузовы) «АгромашХолдинг» акционерлік қо­ғамының цехында дәнекерленіп, боялатын болады. Корейлердің жасағанын қостанайлықтар жасай алмай ма? Осы цехқа қо­сым­ша 150 адам жұмысқа тұрады! «АгромашХолдинг» акционерлік қоғамының атшаптырым ғи­маратында құрастырылып, қаз-қатар қойылған жеңіл машинадан кейін ауыл шаруашылығы тех­никалары жалғасады. Нұрсұлтан Назарбаев комбайндардың қа­сын­да кідірді. Еліміздің тұ­ра­лаған экономикасы 2000-шы жыл­дары еңсесін көтере бас­та­ған­да, алып кәсіпорын ауыл ша­руашылығы саласының тозған техника паркін жаңалауды мақсат еткен болатын. Бұл күнде қа­рым­ды жұмыстар жүргізіліп жатқан кәсіпорында сол меже сөз күйін­ше қалмай, іске ұласқан. «АгромашХолдинг» қазірде ауыл ша­руа­шылығы техникаларының он­нан аса түрін құрастырып шы­ға­рады. Астық жинайтын ESSIL-740, ESSIL-760, жем-шөпке арналған КСК-600 комбайндары диқандар сынынан өткен. «АгромашХолдинг» акционерлік қоғамы Қос­танай филиалының директоры Петр Максаковтың айтуынша, кә­сіпорын осы комбайндардың биыл 6-шы буынын (класын) шы­ғаруға қол жеткізді. Үстіміздегі жылдың өзінде кәсіпорын елі­міздің барлық шалғайындағы ди­қан қауымына 420 комбайн сат­қан. Биыл ғана құрастырылған әлгі 6-шы класты 30 комбайн да иесін тауып үлгерген. «Қазақстанда жасалған» белгісімен өз Отанымызда құрасты­рыл­ған ауыл шаруашылығы тех­ни­каларының көп артық­шы­лық­тары бар. Әсіресе, сауда-сервис орталықтары диқандарға тиімділігін көрсетіп отыр. «Агро­маш­Холдингтің» Қазақстанның об­лыс­тарында 8 сауда-сервистік ор­талықтары жұмыс істейді. Олар өздері сатқан техникаларға қыз­мет көрсетеді. Техниканың аты – техника. Көктемгі, күзгі науқан­дар­да диқан бір қолын екі ете алмай жанығып жатқан кезде техника сынса, сервистік қызмет олар­дың қасынан табылады. Еуропадан, мұхит асып Америкадан әкелінген қуатты ауыл шаруа­шы­лығы техникаларын жөндеу мен олардың қосалқы бөлшектерін табу диқандардың әрі қолын байлап, әрі шығынға батырып отыр­ғаны жасырын емес. Ал «АгромашХолдингтен» ауыл шаруашы­лы­ғы техникалары қосалқы бөл­шектерінің 170 аталымы шыға­ры­лады. Әрі мамандар сынған тех­никаны сол сәтінде барып жөн­деп береді. Міне, дамудың сүрлеуі! «АгромашХолдинг» акционерлік қоғамында тағы бар ин­вес­тициялық жоба қанат қағу ал­дында тұр. Елбасы Нұрсұлтан На­зарбаев УАЗ машиналарын құ­растыруға дайындалып жатқан цехқа келіп, болашақ өнімнің үлгілерімен танысты. Ресейлік «Соллерс» компаниясы мен қос­танайлық «Тобыл» әлеуметтік-кәсіпкерлік корпорациясы бірлесіп, тамаша істі қолға алды. «Тобыл» ӘКК бұл жобаға 2,4 миллиард теңге шығарып отыр. Осы екі ел инвесторлары құйған қаржыға «Сарыарқа Автопром» жауапкершілігі шектеулі серіктестігі УАЗ машиналарының 8 тү­рін құрастырып шығаратын бо­лады. Жобаның жылына 18 мың машина жасайтын қуатты мүм­кіндігі бар. Биыл көз үйреніп, қол жаттыққанша 122 машина құрас­тырылады, оның 52-сі өз иесін тауып қалады деген ой бар. Келесі жылы зауыттан 4175 УАЗ кө­лігі шығарылып, сатылады. Ал 2017 жылы бұл сан екі еседен аса көбейетін болады. 130 қос­та­найлық осы цехтан жұмыс орнын табады. Нұрсұлтан Назарбаев цехқа келгенде жұмысшылармен кездесті. Елбасы елімізде адамдарға жасалып жатқан әлеуметтік игіліктерді айтты. – Мемлекет еңбек адамына барлық жағдайды жасауға ұмты­лып отыр. Баспаналы болуға да мүмкіндік мол. Мысалы, үй ала­сың ба, өз меншігіңдегі үйіңді жөндейсің бе, соған қажетті қар­жының 50 пайызын өзің жинай­сын, қалған 50 пайызын мемлекеттен несиеге аласың. Үйіңе келетін жылу, су, канализаця құ­быр­ларының барлығын да мемлекет өз мойнына алған. Оған сенен шығын шықпайды. Алған не­сиең­ді 7 жылда қайтарасың. Үйің­ді сыйға бергенмен бірдей емес пе мұндай мүмкіндік? Мем­лекет халық үшін жасап отыр­ған осындай әлеуметтік жағ­дай басқа ешбір елде жоқ. Айлық жал­ақы­ны, зейнетақыны көтеріп отыр­мыз. Бұрынғы жа­былған зауыт, фабрикаларды қал­пына келтіріп, жұмыс орын­дарын ашып жатыр­мыз. Мұның барлығы биыл кең көлемде 20 жылдығы атап өті­летін ел тәуел­сіздігінің арқасы, – деді Нұр­сұл­тан Әбішұлы. «АгромашХолдинг» кәсіп­ор­ны­­­ның жұмысшысы Сәкен Жиентаев Елбасыдан бір ауыз сөз сұ­рады. – Нұрсұлтан Әбішұлы, Сіз бізге екі рет келгенде де жұмыс­тан кетпеңдер, еңбек етіңдер деген едіңіз. Сол сөзіңіз санамда жаңғырып тұрғандай, мен сүйікті ісімді жалғастырып келемін. Еш­қайда кеткен жоқпын. Тәуелсіз елімізді қандай да қиындық­тар­дан алып шығып келесіз. Алдағы уақытта да елді табысқа бастай беріңіз, Сізге денсаулық тілеймін, – деді ол. Мұнан кейін Президент мінген кортеж Қостанай қала­сын­дағы облыстық аурухананың құ­рылысы енді біткен корпусына қарай беттеді. Бес блоктан тұратын 6 қа­батты аурухана кешенінің құ­ры­лысы 2008 жылы басталған бо­ла­тын. Бұл инвестициялық нысанға қаржы республика қазынасынан бөлініп, ол «100 мектеп, 100 аурухана» бағдарламасы шеңберін­де салынды. Үстіміздегі жылы 300 орындық жаңа блок пайда­лануға берілгенде, облыстың емдеу орталығының қуаттылығы 555 төсекке жетті. Жаңа кешен­нің құрамына емдеу-диагнос­ти­калық, жұқпалы аурулар, шаруа­шылық, әкімшілік корпустары мен емхана кіреді. Жаңа құры­лыстың сметалық құны 6 миллиард теңгеден асады. Соның ішінде 1 миллиард 600 мың теңгеге аурухана компьютерлік томограф, эндобейнетехника, ультра­ды­бысты аппараттар, операция­лық блок шамдары алынды және урология, нейрохирургия, тора­каль­ды хирургия бөлімшелері заманауи құралдармен жабдық­тал­ды. Елбасы 1913 жылы бой көтер­ген үйдің сыртқы тарихи бейнесін сақтай отырып салынған ең­селі ғимаратқа кірген соң, дә­рігерлермен әңгімелесіп, ауруханада қазір қандай күрделі операциялар жасалатындығын, жаб­дық­тардың қандай шет елдерден алынғанын, мамандардың қайда оқы­тылғанын сұрады. Президентке облыс әкімі Сергей Кулагин мен облыстық аурухананың бас дәрігері Владимир Стельмах жан-жақты жауап берді. 555 тө­сектік қуатты аурухана Қазақ­стан­да некен-саяқ. Мұны Елба­сы­ның өзі де байқады. Облыста бүгінге дейін жөндеу жұмысын күтіп тұрған бес емдеу орны ғана бар, қалған қалалық, аудандық ауруханалар, фельд­шерлік-акушерлік пункттер, учас­келік ауруханалардың бар­лығы да жөндеуден өткізілген. Сергей Кулагиннің айтуынша, 2000 жылы облыста денсаулық сақтау саласына 2,3 миллиард теңге жұмсалса, қазір бұл қаржы 22 миллиард теңгені құрайды. Ел­ба­сы дәрігерлерге ана мен баланың денсаулығын қорғауға ерекше көңіл бөлу қажеттігін ескертті. – Мен өз Жолдауымда адамдар өз денсаулығын өзі ойлау керектігін, медицинаға 10-15 пайыз ғана байланысты екенін айтқан едім. Сол 10-15 пайыздың өзі де маңызды. Осыдан үш жыл бұрын елімізде жүрекке операция жа­сал­ған жоқ. Қазір облыс орта­лық­тарының барлығында дерлік мұндай операциялар жасалуда. Он мың адам шетелге барып емделуге  кезекте тұрды. Оған 50 мың доллар қаржы керек бола­тын. Сол мәселенің барлығы қа­зір шешімін тапты, олар өзімізде емделуде. Денсаулық сақтау ісі – Қазақстанда ең басты назардағы іс. Мемлекеттен  қанша қаржы бөліп отырмыз, сіздерден,  дәрі­герлерден адам өмірін сақтау талап етіледі. Бұл – өте қасиетті жұ­мыс. Сол үшін экономиканы да­мытып отырмыз, – деді Нұрсұлтан Назарбаев. Елбасы  емдеу мекемелерін ме­дициналық заманауи озық  құ­ралдармен жабдықтау жөнінен Қостанай облысы алдың­ғы­лар­дың қатарында екенін айтты. Адам өмірі ұзаруы үшін елімізде алдымен жүрек-қан тамырлары, онкологиялық, туберкулез ауру­лары мен ана мен бала өлімін азайту жолында  жұмыстар жүр­гізіліп жатыр. Ана мен бала өлімі республика бойынша 23 пайызға азайды. Ал Қостанай облысында   ана мен бала өлімі, туберкулез, басқа  бірқатар аурулар респуб­ли­калық  көрсеткіштен төмен. Облыста соңғы он жылда бала туу 28 пайызға  өскен. Дегенмен, Елбасы дәрігерлерге егер ана мен бала өлімін азайтпасақ, өмірге ұрпақ әкелетін ана денсаулығын  жақсартпасақ, мақтануға ерте екенін де ескертті. Елбасымен кездесуде дәрі­гер­лер үстіміздегі жылдың шілдесінен бастап айлық жал­ақы­ларына үстеме қосылғаны үшін Нұрсұл­тан Әбішұлына рахмет айтты. Сондай-ақ жас маман дәрігер Құ­ралбай Асанов ауруханада еңбек етуге барлық жағ­дай жасалғанын және мемлекеттік тұрғын үй бағдарламасы бойын­ша өзінің баспаналы бол­ғанын жеткізді. Елбасы Нұрсұлтан Назарбаев Қостанай облысына сапарының алғашқы күні толағай табысы бар Тобыл өңіріндегі осындай жақсы істерге қанықты. Бүгін мәртебелі қонақ Қостанай ауданының ал­тын жалатқандай астық алқап­тарында болып, облыс диқан­дарымен кездеседі. Нәзира ЖӘРІМБЕТОВА, Қостанай. Суреттерді түсіргендер С.БОНДАРЕНКО, Б.ОТАРБАЕВ.