Жиында 2016 жылғы жұмыс жоспарының қорытындылары мен 2017-2018 жылдарға арналған жұмыс жоспары талқыланды. Оған Қазақстан, Ресей, Қытай, Қырғызстан, Тәжікстан, Беларусь, Пәкістан және Үндістан елдерінің өкілдері қатысты. Бұл форум еліміздің Шанхай ынтымақтастық ұйымына төрағалығы аясында өтті.
Жиында Дін істері және азаматтық қоғам министрі Нұрлан Ермекбаев бұл форумның жастарға түрлі салада ынтымақтастық орнатуы мен тәжірибе алмасуына септігін тигізетінін мәлімдеді. Ол, сондай-ақ, экстремизм мәселесін қозғап, оның алдын алу жолдарын да ұсынды.
– Бұл отырыстағы мәселелер ШЫҰ саммитінің тақырыптарына сай келеді. Инвестициялық, экономикалық, гуманитарлық білім беру, ғылым салаларындағы көкейкесті мәселелер қамтылып отыр. Форум барысында ұсынылатын идеяларыңыз арадағы өзара байланысты нығайтып, жастар саясатында жаңа механизмдердің жасалуына мүмкіндік береді. Сонымен қатар, жастарды жұмылдырып, экстремизмге жол бермеу ісі де назарға алынуы тиіс. Әсіресе, лаңкестік ұйымдар жастардың санасын улап, қатарларына қосып алуға тырысады. Сондықтан, осы мәселеде кәсіпкерлер, белсенділер, спорт жанашырлары арнайы шаралар, жобалар ұйымдастырып, жұмыссыз қоғамда өз орнын таба алмай жүрген жас буынға септігін тигізсе, нұр үстіне нұр болар еді, – деді Нұрлан Ермекбаев.
Басқосудың басты мақсаттарының бірі – ШЫҰ-ға мүше елдердің жастарымен тығыз байланыс орнату. Айта кетерлігі, 2015 жылдың шілде айында ұйымға Үндістан мен Пәкістан елдерін қабылдау рәсімі қолға алынған болатын. Шараға қатысқан Қытай делегациясының басшысы Цзя Бо Пәкістан мен Үндістан мүше болғаннан кейін Еуразия кеңістігінде туризм, спорт, т.б. салаларда ынтымақтастық орнатуға мүмкіндік көбірек болатынын алға тартты. Ол, сондай-ақ, 2017-2018 жылдарға арналған тиімді жоба құрылатынына сенім білдірді.
Пәкістан Ислам Республикасы делегациясының басшысы Киран Акбар ұйымға мүше елдердің жастарымен тығыз қарым-қатынас орнату үшін пікірталас алаңын ұсынуға дайын екендіктерін мәлімдеді. Сонымен қатар, ол өз елі экономика саласының тұрақты дамуына ерекше қызығушылық танытып отырғанын айта келіп, мәдени байланыстарды да нығайтуға ниетті екенін жеткізді.
– Қысқа ғана уақыт ішінде бірнеше салада тәжірибе алмастық, көптеген жобаларды жүзеге асырдық. Түрлі ұйымдардың басшылары жылы лебіздерін білдіріп жатты. ШЫҰ мәдени-гуманитарлық ынтымақтастыққа баса мән беріп келеді. Сондықтан, осы бағыттың қарқын алып, одан әрі нығая түсуіне назар аударуымыз керек. Ұйымға мүше елдердің жастары арасында мобильдік қабілеттерін арттыруына көмек беруіміз қажет. Осы мақсатта арнайы жоба құрып, соны іске асырсақ деген ұсынысымыз бар, – деді Ресей делегациясының басшысы Денис Кравченко.
Айта кетейік, ШЫҰ Жастар кеңесі 2009 жылы құрылып, бүгінге дейін елеулі жұмыстар атқарып келеді. Кеңестің бір ерекшелігі – қандай мәселені де тек консенсус арқылы ғана шешу. Яғни, ұйымға мүше елдер өскелең ұрпаққа пайдасы тиетін жаңа бағыттарды бірге талқылап, бірауыздан шешім шығарады.
Аян ӘБДУӘЛИ, «Егемен Қазақстан»