Сонымен, 28 маусымға белгіленген Парламент Сенатының депутаттарын сайлауға халықаралық ұйымдар мен шет мемлекеттердің байқаушыларын аккредиттеу аяқталды. Орталық сайлау комиссиясының мүшесі Марат Сәрсембаевтың мәліметінше, Сыртқы істер министрлігі сайлауды байқау жөніндегі 2 миссиядан, 2 халықаралық ұйым мен 8 шет мемлекеттен тағы 118 байқаушыны аккредиттеуді ұсынған. Олардың ішінде 66-сы – ТМД байқаушылар миссиясынан. Тарқатып айтсақ, ТМД Парламентаралық Ассамблеясынан – 13 байқаушы, Шанхай ынтымақтастық ұйымынан – 12, Беларусь және Ресей одағы Парламенттік жиналысынан – 3, Түркітілдес елдердің ынтымақтастығы кеңесінен – 10, Түркітілдес елдердің Парламенттік Ассамблеясынан – 5 және 11 шет мемлекеттен 25 байқаушы бар. Ал Орталық сайлау комиссиясы 172 байқаушыны аккредиттеді. Олардың ішінде 106-сы – ТМД Миссиясынан. Халықаралық байқаушылар қатарында 15 шет мемлекеттің орталық сайлау органдарының басшылығы, Ресей Мемлекеттік Думасының, Федералдық Жиналысы Федерация Кеңесінің және ТМД елдері мен түркітілдес мемлекеттер парламенттерінің депутаттары, Қазақстандағы дипломатиялық миссиялардың елшілері мен жоғары лауазымды ресми тұлғалар бар. – Орталық сайлау комиссиясының бүгінгі отырысында шетелдік байқаушылардың мәселесі көтерілді. Ереже бойынша алдымен еліміздің Сыртқы істер министрлігі байқаушыларды акредиттеуден өткізіп, тізімді бізге ұсынады. Сайлауға бір күн қалғанда байқаушылардың көбі осында келеді. Олар Астанада ғана емес, еліміздің басқа да өңірлерінде сайлаудың әділ әрі талапқа сай өтуін бақылайды, – дейді Орталық сайлау комиссиясының мүшесі Марат Сәрсембаев. Оның айтуынша, биыл сайлау процесін өткізуді бақылау үшін алғаш рет электронды жүйе енгізіліп отыр. Осы жүйе арқылы тек акредиттеуден өткен байқаушылар, журналистер ғана емес, бүкіл ел тұрғындары дауыс беру үрдісі барлық заң талаптарына сай өткізіліп жатқанын компьютер арқылы бақылай алады. Бұл – демократиялық қоғамға тән құбылыс, дейді ол. Орталық сайлау комиссиясының отырысында күн тәртібінде қаралған тағы бір мәселе – Өскемен қалалық мәслихатының шығып қалған депутатының орнына сайлауды келісу туралы болды. «Қазақстан Республикасындағы Сайлау туралы» Заңның 101-бабы, 4-тармағына сәйкес шығып қалған мәслихат депутатының орнына сайлау осы жылғы 30 шілдеге тағайындалған. Мұны бірауыздан мақұлдағаннан кейін Шығыс Қазақстан облыстық сайлау комиссиясына сайлауға дайындық және оны өткізуге байланысты ұйымдастыру-әдістемелік жұмыстарды жүргізу тапсырылды.
Қымбат ТОҚТАМҰРАТ, «Егемен Қазақстан»