Астанада мәдени күндерін 29 тамыз бен 3 қыркүйек аралығында өткізуге келген Оңтүстік Қазақстан облысы елордалықтар мен қала қонақтарына 40-тан астам іс-шара әзірлепті. Оңтүстік өңірдің мәдениеті мен тарихын, құнды жәдігерлері мен бейнелеу өнерін дәріптейтін бағдарламада ән мен күй де, қолөнер бұйымдарының көрмесі де, ауылшаруашылық өнімдерінің жәрмеңкесі де, қайырымдылық акциялар да қамтылған.
Орталық коммуникациялар қызметі алаңында брифинг өткізіп, журналистердің сауалына жауап берген Оңтүстік Қазақстан облысы әкімінің орынбасары Ұласбек Сәдібеков елордада ұйымдастырылатын шаралардың легі Елбасы Нұрсұлтан Назарбаевтың «Болашаққа бағдар: рухани жаңғыру» атты бағдарламалық мақаласындағы басымдықтармен ұштастырыла отырып әзірленгенін атап өтті. Басты мақсат – облыстың мәдениетін, руханиятын, әлеуметтік-экономикалық мүмкіндіктері мен тауарларын, тарихи-мәдени орындарын және туристік әлеуетін жұртшылыққа кеңінен таныстыру. Облыстың Астанадағы күндері кеше ЭКСПО халықаралық көрмесінде өткен бизнес-форуммен ашылды. Оған шетелдердің Қазақстанда жұмыс істеп жатқан 30-дан астам елшісі қатысып, еліміздегі кәсіпкерліктің жай-күйін, бизнес пен осы саладағы жобаларға қолдау көрсету мәселелерін талқылады. Облыс әкімінің орынбасары бес күнге созылатын оңтүстік өңірдің күндері аясында өткізілетін 43 шараның ішінде жеті шараны ерекше атап көрсетті. Бұл шаралар топтамасын өздері «Оңтүстіктің 7 кереметі» деп атапты.
Оның біріншісі – Елбасының «Болашаққа бағдар: рухани жаңғыру» бағдарламалық мақаласы шеңберінде облыс әкімі Жансейіт Түймебаевтың идеясымен шығарылған «Тұлға. Тәуелсіздік. Тарих», «Жаһан таныған жеті тұлға» кітаптарының таныстырылымы және бүгін сағат 11.00-де Оқушылар сарайында өтетін «Күш атасы – Қажымұқан» анимациялық фильмінің тұсаукесері.
Екіншісі – «ҚазМұнайГаз» компаниясының ғимаратынан бастап, «Нұржол» гүлзары бойымен «Бәйтерек» алаңына дейін жүріп өтетін түйелер мен аттар керуені. «Түркі елінің түп тамыры – Оңтүстіктен мерейлі Астанаға сәлем!» атты бұл шара ежелгі тарихымыздан сыр шертетін жәдігерлерді жұртшылыққа дәріптейді.
Үшінші керемет шара – 600 жас домбырашының бір мезгілде орындайтын күмбір күйлер шеруі болса, төртіншісі – 31 тамыз күні «Құрбан айт» мерекесіне орайластырылған қоғамдық көліктерде, басқа да көпшілік орындарында өткізілетін қайырымдылық акциясы. Сондай-ақ, «Этноауылда» ұйымдастырылатын шаралар да жеті кереметтің бірінен саналады.
Ал 1-2 қыркүйек күндері екі қабатты ағылшын стиліндегі қызыл автобус елорданы аралайды. Бұл көлік Астананың көрнекті орындарына барып, Мәңгілік Ел, Сарыарқа және басқа да басты көшелерімен жүріп өтеді. Бұл да – жеті кереметтің қатарындағы шара. Оңтүстік Қазақстан облысының күндері қасиетті Құрбан айтпен тұспа-тұс келіп отыр. Осыған байланысты оңтүстікқазақстандықтар қайырымдылық шараларына көбірек көңіл бөліпті. 31 тамыз күні осы өңірдің жастары Астананың қоғамдық көліктерінде және халық көп шоғырланған қоғамдық орындарда бауырсақ пен тәтті тоқаштар таратады.
Оңтүстік Қазақстан облысы күндерінде жұртшылықтың асыға күтетіні – ауылшаруашылық өнімдерінің жәрмеңкесі екені белгілі. Осы жолы да олар жалпы құны 265 млн теңгені құрайтын 550 тоннаға жуық азық-түлік әкеліпті. «Әсіресе, арзан жеміс-жидек көп әкелдік. Өйткені, алдыңғы жәрмеңкелер осы өнімдерге сұраныс үлкен екенін аңғартты», дейді Ұласбек Сәдібеков.
Оңтүстік Қазақстан облысының ауылшаруашылық өнімдерінің жәрмеңкесі 30, 31 тамыз күндері сағат 9.00-ден бастап, Бейбітшілік және келісім сарайының алдында өтсе, 2,3 қыркүйек күндері дәл осы уақыттан бастап, «Қазақстан» спорт кешені алаңында ұйымдастырылады. Қонақжай оңтүстік жұрты астаналықтарды аталған іс-шараларға белсене қатысуға шақырады.
Қымбат ТОҚТАМҰРАТ, «Егемен Қазақстан»