Желтоқсан айы еліміз үшін елеулі мерекелерге толы. Ең алғашқысы Қазақстан Республикасының Тұңғыш Президенті күніне арналған мерекелік іс-шара Қазақстан халқы Ассамблеясы өкілдерінің қатысуымен Алматыдағы Ұлттық кітапханада өтті.
Жиынды жүргізген Алматы қаласы әкімі аппаратының «Қоғамдық келісім» ККМ директоры Жаннат Мұрынова өз сөзін басқосуға жиналған зиялы қауымға Алматы қалалық ономастика жөніндегі комиссиясының ел Үкіметі жанындағы ономастика комиссиясының келісімімен Фурманов көшесін Н.Назарбаевтың атына ауыстыру туралы шешімін оқып, сүйінші сұраудан бастады.
Ұлттық кітапхана директоры Ж.Сейдуманов бүкіл дүние жүзінің кітапханалар жүйесімен байланыстың нығайып келе жатқанын, әлемнің қай еліне, қандай Ұлттық кітапханасына барса да, рухани мұра мен мол кітап қорына жетекшілік жасап отырған басшылар тарапынан Қазақстан Президентінің жасампаз ісіне қызыға қарайтынын, Президент Н.Назарбаевтың еңбектерін немесе Елбасы туралы жазылған кітаптарды сыйға тартуын сұрайтын өтініштердің жиі жасалатынын айтты. Президенттің кітаптары Қазақстанды мекендейтін ұлттардың көпшілігінің тіліне аударылған, сондықтан Н.Назарбаев толыққанды шығармаларының бүтін коллекциясы жинақталған бірден-бір автор болып есептеледі.
Алматы қаласындағы «Ирныхас» осетин мәдени ағартушылық орталығының төрағасы Қазбек Мамсуров тәуелсіздік жылдарынан бергі өзі сүйсініп, бағалаған Президенттің бірнеше еңбегінің мазмұнын тарқатты. Ал Алматыдағы корей ұлттық орталығы төрағасының орынбасары, тарих ғылымдарының докторы, профессор Георгий Кан өзі үшін және өзі секілді Қазақстанды Отаным деп танитын тағдырластары үшін Тұңғыш Президент күнінің мән-мазмұны айрықша екенін толқи отырып жеткізді. Тұңғыш Президент күні – жай саяси атаулы күннен әлдеқайда жоғары тұратын жалпыұлттық мереке. Президент күнін тек Қазақстан ғана емес, сонау 1855 жылдан бері АҚШ халқы, Исландия жұрты, сондай-ақ Ботсвана, ағылшын монархиясының атаулы күнін Ұлыбритания, Король күнін Голландия, тағы басқа әлем елдері де байырғы кезеңдерден бері тойлап, жалпыұлттық мерекеге айналдырған. Тұңғыш Президент күнін атап өтудің қазақстандық дәстүрінің қалыптасқанына да биыл, міне, алтыншы жыл. Корей ұлттық орталығы жетекшілерінің бірі Г.Кан Президент туралы тебіреніске толы жүрекжарды сөзін Абайдың 39-қарасөзімен қисынды байланыстырды. «Мен Абайды оқымай бір күн де көз ілген емеспін. Барлық сұрағымның жауабын Абайдан табамын. Абай Елбасы туралы толғамын баяғыда, өзі өмір сүрген заманда-ақ 39-қарасөзінде айтып кеткен. «Ол заманда ел басы, топ басы деген кісілер болады екен. Көш-қонды болса, дау-жанжалды болса, билік соларда болады екен. Өзге қара жұрт жақсы-жаман өздерінің шаруасымен жүре береді екен. Ол ел басы мен топ басылары қалай қылса, қалай бітірсе, халықта оны сынамақ, бірден бірге жүргізбек болмайды екен. «Қой асығын қолыңа ал, қолайыңа жақса, сақа қой», «Бас-басыңа би болса, манар тауға сыймассың, басалқаңыз бар болса, жанған отқа күймессің» деп мақал айтып, тілеу қылып, екі тізгін, бір шылбырды бердік саған, берген соң, қайтып бұзылмақ түгіл, жетпегеніңді жетілтемін деп, жамандығын жасырып, жақсылығын асырамын деп тырысады екен. Оны зор тұтып, әулие тұтып, онан соң жақсылары да көп азбайды екен. Бәрі өз бауыры, бәрі өз малы болған соң, шыныменен жетесінде жоқ болмаса, солардың қамын жемей қайтеді?».
Іс-шараның екінші бөлімінде Алматы қаласы ҚХА Хатшылығы мен Алматы қаласы әкімі аппаратының «Қоғамдық келісім» КММ елдің өркендеуі жолында адал қызмет етіп, қоғамдық келісім мен ұлтаралық бірліктің нығаюына қосқан үлесі үшін этникалық бірлестіктердің бірқатар өкілін Алғыс хатпен марапаттады. Соңынан Қазақстан Республикасының Тұңғыш Президенті жайлы кітап көрмесі мен фильм көрсетілді.
Айгүл АХАНБАЙҚЫЗЫ, «Егемен Қазақстан»
АЛМАТЫ