Жалпы, Ақмола облысында «Рухани жаңғыру» бағдарламасы бойынша 2022 жылға қарай 107 жобаның жүзеге асырылуы жоспарланып отыр.
Солардың ең бастылары Бурабай, Қорғалжын және Зеренді аудандарында шоғырланғандығын айта кеткен жөн. Көкше жері табиғаты сұлу өңір ғана емес, сонымен қатар рухани құндылықтарға да бай өлке саналады.
Облыстық ішкі саясат басқармасының маманы, «Рухани жаңғыру» бағдарламасының ӨЖО бас менеджері Әсем Әзірбаеваның мәліметіне қарағанда, «Рухани жаңғыру» бағдарламасының «Тәрбие және білім» кіші бағдарламасы бойынша 24 шағын жоба және «Рухани қазына» бойынша 79 жоба іске асуда. Бұдан басқа, ұлттық дәстүрлер мен құндылықтарды, ішкі туризмді дамыту жөніндегі іс-шаралар, сондай-ақ «Атамекен» кіші бағдарламасы бойынша 4 жоба қарастырылған. Реті келгенде «Қазақстанның 100 қасиетті орны» республикалық тізіміне Ақмола облысы бойынша 10 нысан енгендігін айта кету керек. Бұл ретте облыстық мәдениет басқармасының басшысы Сәуле Бөрібаева Ерейментау ауданы аумағындағы Құмай бірегей археологиялық және этнографиялық кешенін ерекше атап кетті. Өйткені мұнда қола дәуірі, ерте темір дәуірі сияқты дамудың кезеңдері сақталған. Солардың ішіндегі ең маңыздысы, ол I-VI ғасырларға дейінгі Батыс түрік қағанаты кезеңінің тас мүсіндері саналады. Сондай-ақ өңірімізде «Атамекен» кіші бағдарламасы шеңберінде 2017 жылы 4,8 миллиард теңге сомасында бірнеше мәдени, тарихи және әлеуметтік нысандарды қайта құру және салу бағытында 57 жоба қолға алынып, жүзеге асырылды.
Асқар Тұрапбайұлы,
«Егемен Қазақстан»
Ақмола облысы