Лондон университеті колледжінің зерттеушілер тобы адамның өмір сүру жасын арттыру мен қартаюға ықпал ететін бірнеше әлеуметтік факторды анықтапты.
Туысшыл, бауырмашыл келетін қазақ халқы үшін бұл жаңалық аздап күлкілі көрінуі де мүмкін. Әйткенмен Proceedings of the National Academy of Sciences журналына жарияланған ғылыми тұжырымы дана қазақтың «кекшіл болма, көпшіл бол» деген ұстанымынан алысқа ұзай қоймапты.
Ғалымдардың қорытындысы бойынша, достар мен ет жақын туыспен есендесіп, жиі кездесіп тұру адамның ғұмыр жасын ұзартатын болып шыққан. Зерттеушілер төрт жыл бойы 50 жастан жоғары (орташа жас 67,2) 7 мыңнан астам адамды бақылауға алған. Нәтижесінде, белгілі болғандай, жақындарымен етене араласқан қарттардың көңіл күйі жоғары, сәйкесінше денсаулықтары да мықты болып шыққан.
Олардың 73 пайыздан астамы кем дегенде аптасына бір рет достарымен жүздесіп, спорт залдарына барып, музей, театр, құлшылық орындары сияқты қоғамдық орындарды аралаған. Ал мамандар осындай белсенді өмір салты ересек адамдар үшін маңызды ғана емес, көңіліне қуаныш, деніне қуат сыйлайтынын растап отыр. Ғылым ғылымымен, ал бүгінгі абысын-ажындар тату ма? Алысты жақын, жақынды бауыр тұтқан қазақы ұғымдағы туысқандық, бауырмалдық баяғыдай ма?
Ая ӨМІРТАЙ,
«Егемен Қазақстан»