Таяуда Қазақстан Суретшілер одағының мүшесі, Тәуелсіз «Тарлан» сыйлығының лауреаты, Көркемөнер академиясының академигі Асқар Есенбаевтың «Ізденіс уақыты» атты көрмесін тамашалаудың сәті түскен еді. Шебер тілінің тылсым құдіреті өзіне еріксіз баурайды. Экспозиция мүсіндік портреттер мен символикалық портреттерді, графикалық жұмыстарды, бәрін қосқанда әр жылдарда шебердің қолынан шыққан тоқсаннан астам туындыны қамтыған.
«Адамның көзі үшін ерекше конфигурацияларда жан мен ойдың фантастикалық мүмкіндігін өзінің оғаш денесімен сендіретін басқа жаратылыстардың таңғажайып образдарын жасай алатындығының арқасында авторға экспрессия мен гипербола тілі жақынырақ. Қарапайым ғана мүсіндік көлемдер өмірдің трагедиялық мәнін бере алатын болса, онда минимализмнің тілі Есенбаевқа тәуелді болды дей беріңіз», дейді өнер иесінің қолтаңбасы хақында өнертанушы Баян Барманқұлова.
Асқар Есенбаевтың шығармашылық жолы 80-жылдардың ортасында басталды. Көрмеден мүсіншінің өз уақытында өнерсүйер қауымнан жоғары баға алған «Кітапханашы Люся», «Виктор» сынды танымал туындыларын кездестіруге болады. Сонымен қатар экспозицияда Мемлекеттік өнер музейі қорынан алынған автордың 1985 жылы орындаған өздерінің пәктігімен және қорғансыздығымен адам жанын тебірентетін ұл бала мен қыз баланың мүсіндері бейнеленген «Балалар» деп аталатын композициясы да ұсынылған. Иса пайғамбардың «Сендер ‒ менің достарымсыңдар» деген сөзімен аталған шығармасы Иса пайғамбар мен оның рухани кемелдікке ұмтылған он екі шәкіртінің жұмыла, екпінді әрі сенімді адымдаған шебінен тұрады. Күміс жағылған граниттен жасалып, миф пен діннің құпия кеңістігі арасында салтанат құрған адамзат тарихына қойылған басты ескерткіштерге арналған объектілер топтамасы да қызығушылық тудырады. Сан қырлы мүсіндерге көңіл қойсаңыз, өзінің символикалық мәндерінің қарапайымдығымен және күрделілігімен көз тартатын көне замандардың кейпіне енгендей күй кешесіз.
А.Есенбаевтың жұмыстары Ә.Қастеев атындағы Мемлекеттік өнер музейінің қорында, Мемлекеттік Третьяков галереясында, сондай-ақ АҚШ, Италия, Германия, Франция және Ресей елдерінің жеке коллекцияларында сақтаулы.
АЛМАТЫ