Заманында мәдени болмысы мен құндылықтар жүйесі тұтас болған Ұлы дала өркениетін қайта жаңғыртуды мақсат еткен фестиваль биыл екінші рет ұйымдастырылды. Жыл сайын халықаралық ауқымды сипат алып келе жатқан жиын сан ғасырлық тәжірибедегі көшпелі тұрмыс салтын мәдени тұрғыда ортақ бір нәтижеге жеткізуді көздейді.
– Өткен жылы 8 елден 90-ға жуық өнерпаз келген болса, биыл 10 мемлекеттен 180-нен астам қатысушы бас қосты. Атап айтқанда, Әзербайжан, Моңғолия, Иран, Оңтүстік Корея, Өзбекстан сынды елдер. Мұндағы мақсат – астанамыздың дамыған бүгінгі келбетін ғана емес, бай мәдениетімізді, тарихи мұраларымызды көрсету, – дейді «Kazakh Тourism» АҚ төрағасының орынбасары Тимур Дүйсенғалиев. Оның айтуынша, фестивальді дәстүрлі мерекеге айналдыру туристік саланы ғана емес, қомақты табыс әкелу тұрғысынан да тиімді. Қалалар мен аймақтардағы жергілікті өндірістердің қосымша дамуына ықпал етеді.
– Былтыр фестивальге 5 мыңға жуық қала тұрғындары мен қонақтар қатысты. Биыл бағымызға орай, 29 маусым күні Димаштың концертке әлемнің 60 елінен қонақтар келді. Ал оларды мәдени алуандыққа ие осындай этно фестиваль неге қызықтырмасқа?! Еуразиялық идея экономикалық тұрғыдан ғана емес, мәдени бірлестікке шақырады, – деді ол.
Қатысушылар қала көшелерінде салтанатты шеруге шығып, қонақтар кәсіби садақшылардың атысына, көкпаршылар мен бүркітшілердің сайысына, жекпе-жек өнеріне куә болды. Әлемге танылған этно-музыка орындаушыларының қатысуымен нағыз мейрамға айналды. Соның арасында, таяуда ғана YouTube арнасында танымал болып, рок-музыканы бағалаушылар ғана емес, мәдениеттанушылар мен тарихшыларды таң-тамаша еткен моңғолиялық «The Hu» фолк-метал-тобы өнер көрсетті.
«Қазақстан мен Моңғолия арасында бірлескен жоспарлар бойынша ортақ дүние жеткілікті. Қазір әлемде көшпенділердің этно мәдениетіне қызығушылық танытып отырғандар көп. Музыкадағы жаңа бағытты ойлап тауып, оны «хунну-рок» деп атап, ішекті музыкалық аспаптар мен көмеймен орындауды шебер үйлестіріп жүрген «The Hu» тобы, «The Altai band» сынды этно фолк бағытындағы топтар ән салды. Көшпенділер мәдениетін танытуды мақсат еткен мұндай фестивальдердің ұлттық тұрғыда, әлемдік ауқымда маңызы өте жоғары. Өнер мерекесіне қатысу бізге үлкен қуаныш сыйлайды», дейді Моңғолия командасының жетекшісі Долгион Балчияв.
Аталған іс-шараның өтуіне «Kazakh Тourism» АҚ тарапынан Туризм индустриясы комитеті тапсырысы бойынша Нұр-Сұлтан қаласы әкімдігінің ұйымдастыруымен 130 миллион теңге бөлінген. Қаржының басым бөлігі шетелдік қонақтардың жүріп-тұруына, оларды орналастыруға жұмсалды. «Kazakh Тourism» АҚ келешекте ішкі туризмнің дамуына оң әсер ететін «Apple fest», «Алтай – өркениет бесігі» атты бірқатар жиындарды жоғары деңгейде өткізді.