Қазақстан Республикасының Тұңғыш Президенті – Елбасы қоры Елбасы Нұрсұлтан Назарбаевтың тапсырмасына сәйкес жас таланттар мен көшбасшыларды қолдау мақсатындағы «Ел үміті» атты жаңа бастамасын бастады. Жуырда Елбасы Нұрсұлтан Назарбаев Тұңғыш Президент қорының атқарушы директоры Әсет Исекешевпен кездесу барысында «Ел үміті» және «Қамқорлық» бастамалары бойынша арнайы тапсырмалар берген болатын. – Қор бірқатар іс-шараны жүзеге асыру үшін тиісті жұмыс жүргізіп келеді. Біз талантты жастарды және дамуында ерекшелігі бар балаларды қолдауға бағытталған «Ел үміті» және «Қамқорлық» атты жаңа екі жобаны іске асыруды бастаймыз. Талантты жастарымыз ел ішінде және шетелде білім алуы үшін оларға көмектесуіміз керек. Бұл – өте пайдалы әрі қажетті жұмыс. Жалпы Қордың осы бағыттағы жұмысын жандандыру керек, – деген-ді Қазақстанның Тұңғыш Президенті.
Елбасы академиясы құрылады
Осы орайда аталған қордың атқарушы директоры Әсет Исекешев «Ел үміті» бастамасының миссиясы – еліміздің дарынды балалары мен жастарын, соның ішінде шетелде тұратын жастарды іздеп-тауып, қолдауға септесу екенін айтады. «Біз бұл бастаманың аясында еліміздің жастарын барынша қамтуға тырысамыз, олардың ерекшелігін, дарынын, ғылыми және көшбасшылық әлеуетін ескере отырып, әр балаға өзін өзі дамытуына тең мүмкіндік береміз», деді Ә.Исекешев.
Қордың баспасөз қызметі таратқан ақпаратқа сәйкес, «Ел үміті» бастамасы аясында Тұңғыш Президент қоры Үкіметпен, облыс әкімдіктерімен, қоғамдық бірлестіктерімен, білім беру жеке ұйымдарымен, бизнес қауымдастығымен және қызығушылық білдірген тараптармен бірлесіп жұмыс істемек. Серіктестермен бірге жүзеге асырылатын жобалар қатарында дарындарды анықтау және қолдау орталықтарын құру, жастар үшін көшбасшылық және тұлғалық өсу бағдарламасын жасау және жүзеге асыру, Олимпиада жеңімпаздары мен олардың педагогтарын қолдау бағдарламасы, таланттар мен көшбасшыларды қосатын біріккен қауымдастық құру, «IQanat» қорымен бірге ауыл балаларына арналған «Мың бала» зияткерлік даму бағдарламасын жүзеге асыруға көмек көрсету көзделіп отыр.
Жас таланттар мен әр саладағы көшбасшылардың (патриотизм, спорттық жетістіктер, еріктілік, академиялық жетістіктер) жан-жақты дамуы үшін жұмысты күшейту мақсатында жеке өсу бағдарламасына белсенді қатысқандар үшін марапаттау бағдарламасы жасалады. Осы міндеттердің іске асырылуын үйлестіру үшін қордың жанында «Елбасы академиясы» құрылады. Бұл «Ел үміті» бастамасын іске асыруды басқару жөніндегі оператор ретінде әрекет етеді. «Ел үміті» бастамасының аясында әдістемелер, тағылымдамалар бағдарламалары мен гранттар әзірленеді. Бұл әр өңірде жыл сайын ауылдар мен шағын қалалардан кемінде 3 мың дарынды баланы анықтап, кейінгі білім беруде қолдау көрсететін таланттарды анықтау және қолдау орталықтарын (17 орталық) құруға мүмкіндік береді.
Бірінші кезеңде, екі жыл аралығында ғылым, экономика, мәдениет, спорт және қоғамның басқа да бағыттарының мемлекеттік басқару салаларында 500-ден кем емес көшбасшы пулын қалыптастыру жоспарда бар. Дарынды жастар, көшбасшылар мен оқытушыларының Бірыңғай қоғамдастығы құрылады. Бастаманы уақтылы және сапалы іске асыру үшін Тұңғыш Президент қоры мүдделі мемлекеттік органдармен бірлесіп «Жол картасының» жобасын дайындады. Сонымен қатар Тұңғыш Президент қоры білім беру және жеке тұлғаны дамыту бойынша жеке қорлардың бастамаларына қолдау көрсетеді.
Ерекше қажеттіліктері бар балаларға қолдау көрсетпек
Сондай-ақ Елбасының қоры ерекше қажеттіліктері бар балаларды қолдауға бағытталған «Қамқорлық» жаңа бастамасын іске асыру бойынша да жұмысын бастады. Бүгінде Қазақстанда шамамен 86 мың мүмкіндігі шектеулі бала және ерекше қажеттіліктері бар 156 мың бала бар. Жүргізілген талдаулар бойынша, балалардың көбі оңалтуды үнемі қажет етеді. Бұл – жүйке жүйесі, тірек-қимыл жүйесі және басқа да ауыр дерттері бар балалар. Осы мақсатта Тұңғыш Президент қоры мемлекеттік, коммерциялық және қоғамдық институттардың күш-жігерін біріктіре келе, дамуында ауытқуы бар балалардың өмір сүру жағдайын жақсарту мақсатында, нақты айтқанда, аталған санаттағы балаларды қолдау жүйесін жаңғырту бойынша жұмыс жүргізуде.
Тұңғыш Президент қорының атқарушы директоры Ә.Исекешев бұл бастаманы іске асырудың негізгі тетіктері туралы былай дейді: «Тұңғыш Президент қоры осы бастама аясында мүгедектікті азайту, әлеуметтендіру, алдын алу және ерекше қажеттіліктері бар балаларға жағдай жасау үшін бірінші кезекте қолданыстағы инфрақұрылым негізінде сегіз оңалту орталығын ашуға көмектеседі. Сонымен қатар біз білім беру ұйымдарында сегіз инклюзияны қолдау ресурстық кабинеттерін ашуға көмектесуді жоспарлап отырмыз. Мұндай орталықтар әсіресе Нұр-Сұлтан, Тараз, Түркістан, Семей, Қостанай, Орал, Атырау және Талдықорған қалаларына қажет. Елбасының тапсырмасына сәйкес, орталықтарды қажетті жабдықтармен «Самұрық-Қазына» ҰӘҚ» АҚ қамтамасыз етеді».
Тұңғыш Президент қоры мамандар даярлау және шоғырландырылған электронды платформа құруға жәрдемдеспек. Жоғарыда аталған іс-шаралар – «Қамқорлық» бастамасының бірінші кезеңі. Бұл жыл сайын ерекше қажеттіліктері бар 5 мыңға жуық балаға қажетті көмек көрсетуге мүмкіндік береді. Бұл ретте алдағы уақытта ықпалдастырылған көмек жүйесі құрылатын болады.