Әр адамның діни наным-сенім бостандығына құрметпен қарау – парыз. Алайда, сананы улаған ағымдардан сақтандыру мен қорғану жұмысын үнемі жетілдіріп отыру жалпының міндеті болуы керек. Әсіресе жас ұрпақ өкілінің жат діни ағымдардың арбауына түспеуі үшін мемлекеттік қатаң шаралар қабылдауға міндетті.
Дерек бойынша, соңғы кездері тыйым салынған діни ағымдар ғаламтор арқылы белсенді жұмыс істей бастаған. Яғни, интернет кеңістігіндегі астыртын әрекеттің күшеюі жастар арасындағы діни адасуға ұрыну қауіпін де туғызуда. Қуаныштысы, елімізде бұл қатердің алдын алу жұмысы жолға қойылған. Бүгінде ғаламтор желісіндегі тыйым салынған діни идеяларды таратушылармен күрес «Kazdream Media» мониторинг жүйесі арқылы бақыланады екен. Арнайы жүйе бойынша интернет кеңістігін үздіксіз зерделеп, жалған діни ағымдарды насихаттаушылар мен ұстанушыларды дер кезінде танып, қатерлі аймақтарды да анықтауға болады. Мониторинг нәтижесіз емес. Мысалға, осы жүйе іске қосылғалы бері Алматы облысынының аумағында дәстүрлі емес діни ағымдардың уағызын тыңдап, таратуға әрекет жасаған 45 141 ғаламтор қолданушы анықталған. Күдікті интернет тұтынушылардың ID мекенжайы анықталып, сол арқылы күдікке ілінгендермен түсіндіру жұмысын жүргізу үшін полиция мен аудан, қала әкімдіктері жұмыс істеуде.
Сондай-ақ, облыс аумағында бір жыл бойы ғаламторға жасалған зерделеу жұмыстары 2477 діни насихат көзін сараптауға мүмкіндік берген. Оның ішінде әлеуметтік желідегі бірлестіктер, топтар, видеоканалдар, мессенджерлер және сайттарға жасалған зерттеуден кейін 564 насихат көзі Қазақстан Республикасының заңдарына сәйкес қауіпті деп табылып, бұғатталған екен.
Айтпақшы, Алматы облысы дін істері басқармасының дерегінше аймақта миссионерлік қызметпен айналысу үшін 29 заңды тұлғаға рұқсат берілген. Олардың жұмысы еліміздің «Діни қызмет және діни бірлестіктер туралы» Заңы негізінде қадағаланып отыр екен. Ал шетел азаматтарының миссионерлік қызметі басқарма тарапынан қатаң бақылауға алынған.
Дерекке сүйенсек ресми тіркелген 29 миссионердің ішінде 19 заңды тұлға католик дінін, 4 нысан протестанттық бағытты, 3 діни бірлестік ислам дінін уағыздаса, тағы 3 діни қауымдастық дәстүрлі емес діни нанымды ұстанушы, яғни, Кришна жолындағылар екен.
Оның ішінде Жетісудағы дін тарату ісі жолында 9 мемлекеттен келген шетелдік өкіл тер төгіп жүр. Олардың арасында Оңтүстік Кореядан келген 6 пірәдар, польшалық 6 миссионер, испаниялық 5 діндар, италиялық 2 әулие, түркиялық 2 молла, ресейлік 2 поп және Мысырдан – 1, Америкадан – 1 дін таратушы бар. Тағы 3 қазақстандық та осы діни ағартушылық миссия бағытында қызмет көрсетіп жүр екен.
Алматы облысы