6-8 ақпан күндері әлемнің бірқатар қаласында 16 команданың қатысуымен Федерация кубогы жолындағы жарыстың іріктеу сындары өтеді. Аталған турнирде Қазақстанның теннисшілері Бельгия құрамасымен шеберлік байқасады. Бұл бәсеке Лис өзенінің жағалауында орналасқан тарихи шаһар – Кортрейкте өтеді. Ал сол шешуші сындағы қарсылас команда жайында біз не білеміз?
Бельгияның әйелдер құрамасы Федерация кубогында 1963 жылдан бері бақ сынасуда. Сол аралықта небәрі төрт рет қана (1995, 2014, 2015, 2016) элиталық дивизионда өнер көрсете алған жоқ. Ал қалған жарыстардың барлығында олар үздіксіз бой көрсетуде. Бұл ретте қол жеткізген табыстары да елеулі. Атап айтсақ, 2001 жылы бельгиялықтар бас жүлдені олжалады. Құрамында Ким Клейстерс, Жюстин Энен, Элс Калленс және Лоранс Куртуа сынды мықтылары бар аталған елдің өкілдері ақтық сайыста Ресей командасынан 2:1 есебімен басым түсті.
2006 жылы да Бельгия теннисшілерінің Федерация кубогын жеңіп алуына тамаша мүмкіндігі болды. Барлық қарсыластарын оңай еңсерген олар финалда Италиямен жолықты. Бұл бәсеке 3:2 есебімен Апеннин түбегінен келген арулардың пайдасына шешілді. Сонымен қатар бельгиялықтар тоғыз рет (1970, 1972, 1974, 1975, 1977, 1988, 1997, 2003, 2011) жартылай финалда күш сынасты.
Былтырғы жарыста Бельгия құрамасы үздік сегіз команданың қатарына қосылғанымен, әлемдік топтағы турнирдің алғашқы айналымында Францияның аруларынан айлаларын асыра алмады. Есеп – 1:3.
Қазіргі кезде «ТОП-100» теннисшінің қатарына аталған мемлекеттің үш өкілі еніп отыр. Солардың арасындағы ең мықтысы – Элизе Мертенс. Бельгияның бірінші ракеткасы саналатын 24 жастағы Элизе 2018 жылы Аустралияның ашық біріншілігінің жартылай финалына шықса, 2019 жылы АҚШ-тың ашық біріншілігінде үздік сегіз ойыншының қатарынан көрінді. WTA турнирлерінде бес рет және ITF жарыстарында 11 мәрте жеңімпаз атанды. Осы жарыстарда табысты өнер көрсеткенінің арқасында 6 миллион доллар көлемінде табыс тапты. Қазіргі кезде ол әлемдік рейтингте 14-орынды иеленуде. Былтыр Мертенс АҚШ-тың ашық біріншілігінің жұптық сайысында жеңімпаз атанды.
25 жастағы Алисон ван Эйтванк әлемдік рейтингте 47-орында тұр. Вилворденің тумасының ең үздік көрсеткіші – 2015 жылы Ролан Гарростың ширек финалына дейін жетуі. WTA турнирлерінде төрт мәрте және ITF жарыстарында 12 рет топ жарды.
Бельгияның үшінші ракеткасы Кирстен Флипкенс – өте тәжірибелі ойыншы. 34 жастағы теннисші 2013 жылы Уимблдонның жартылай финалында өнер көрсетіп, «ТОП-15» ойыншының қатарына қосылған. Олардан бөлек, Исалин Бонавантюр (әлемнің 115-ракеткасы), Гретье Минненен (әлемнің 119-ракеткасы) және Янина Викмайерді (әлемнің 147-ракеткасы) атап өтуге болады. Олар да талай дүрмекті көрген сақа спортшылар. Міне, Федерация кубогы жолындағы жарыстағы Қазақстан құрамасына қарсылас команда атанған жайында қысқаша мәліметтер осындай.
Ал аталған жарыстың өзге іріктеу бәсекелерінде мына командалар өзара шеберлік байқасады: АҚШ-Латвия, Нидерланд-Беларусь, Румыния-Ресей, Бразилия-Германия, Испания-Жапония, Швейцария-Канада және Словакия-Ұлыбритания.