Ең бастысы – сабыр сақтау және мойымау

«Коронавирус жұқтырғандар статистикасы үнемі жаңаруда. Індет еліміздің түгелге жуық өңіріне таралды. Сондықтан бірқатар өңірде карантин талаптары күшейтілді. Мұның бар­лығы азаматтар үшін мо­ральдық, эмоционалдық тұрғыда оңай емес екенін түсінеміз. Сол үшін, қазір ең бастысы – сабыр сақтау және мойымау. Бұл шешімдердің барлығы – ұлттық қауіпсіздік үшін қажет шаралар. Басты мақсат – елдің, халықтың қауіпсіздігі. Сондықтан айтылған талаптарды қатаң сақтау керек. Қоғам амандығының басты шарты – осы», деді Д.Абаев.

Өткен аптада Мемлекет басшысы Қасым-Жомарт Тоқаевтың Әскери міндетті азаматтарды арнаулы жиындарға шақыру туралы қаулысы шықты. Д.Абаев мемлекет басшылыққа алатын қағидаттарды атап өтті. «Бірін­шіден, қажет болған жағдайда ғана шақыру. Мемлекет күші жеткілікті жерлерге әскери мін­детті адамдарды шақырмайды. Екіншіден, өз еркімен баратын адамдарға басымдық беріледі», деген ол қабылдау кезінде жасы, отбасылық және денсаулық жағдайы сияқты барлық факторлар ескерілетінін, жұмыс істеу­ші­лердің жалақысы сақ­та­латынын, сондай-ақ жұмыссыз азаматтарға төлемдер болатынын да жеткізді.

Бұған қоса оларға қызметте тәулік бойы болу қажет емес, жұмыс күні аяқталғаннан кейін үйіне қайтады және олар­дың барлығы медициналық бақы­лаудан өтеді, қорғаныш құрал­дарымен қамтамасыз етіледі. Осыны түсіндірген министр: «Бүгіннің өзінде бірқатар азамат Отанға қызмет етуге дайын екендігін білдірді. Осы тұста, сол азаматтарымызға алғыс айтамын. Елдің қорғаны мен мақтанышы – өздеріңіз. Сонымен бірге қазір көптеген азаматты ел қорғаны деуге толық негіз бар. Олар – вируспен күресіп жатқан дәрігерлер, мұқтаж жандарға көмек беріп жүрген волонтерлер, күніне жүздеген маска тігіп жат­қан тігіншілер, карантин режімінің сақталуын бақылап жүрген полиция қызметкерлері, антисептик шығарып жатқан зауыт жұмысшылары, жедел жәрдем жүргізушілері. Міне, Президенттің «Біз біргеміз!» деген ұранының мәні мен мағынасы да осында.

Әр адам өз ісін адал атқарып, ортақ проблеманы шешуге атсалысады. Осылайша Отанға қызмет етеді. Әс­ке­ри міндетті азаматтарды шақыру деге­німіз – мемлекет проблемаларды аза­маттар арқылы шешейін деп жатыр деген сөз емес. Бұл – адамдарды өзде­рінің қауіпсіздігін қамтамасыз етуге ба­рынша кеңінен тарту жөніндегі конс­ти­туциялық шара», деді. 

Діни шараларға уақытша тыйым салынады

Д.Абаев төтенше жағдайға байланысты діни шараларға да уақытша тыйым салынғанын хабарлады. «Сә­уір айында біздер үшін маңызды діни мейрамдар келе жатыр. Олар – Ораза, православтық және католиктік Пас­ха, яһудилік Песах және тағы да бас­қалар. Сөзсіз оның барлығы азамат үшін үлкен маңызы бар. Біз аза­мат­тарымыздың діни сеніміне зор құр­метпен қараймыз. Алайда коронавирус індеті барлық адамның денсаулығына, өміріне қауіп төндіруде. Сол үшін көп ел эпидемияға қарсы бұрын-соңды болмаған шектеулер енгізуде. Ви­рус таралмауы үшін адамдар жинала­тын барлық шараға, оның ішінде діни шараға да уақытша тыйым салынды. Себебі бұл діни шаралар кезінде адамдар ғибадат орындарына барып, туыстарымен, жақындарымен жина­лады. Бірге мазар басына барады. Одан да басқа әртүрлі мәдени-көпші­лік іс-шаралар болады. Сол үшін қазір­гідей күрделі уақытта ең басты мәселе – адамдардың денсаулығы мен аман­дығы. Ешқандай дін адам өмірі мен денсаулығына қауіп төндіргенді мақұлдамайды», деген министр барлық діни және этномәдени ұйымдарының басшылары мен азаматтарын түсіністік танытуға шақырып, осы мейрамдар кезінде карантин режімінің сақталуын сұрады. Сондай-ақ мерекелік рәсімдерді онлайн өткізуді ұсынды.

Жұма күні Премьер-Ми­нис­трдің төр­ағалығымен Мемле­кеттік комиссияның отырысы өтіп, бірқатар мәселе қа­рал­ды. Соның ішінде Жұмыспен қамтудың жол картасын жүзеге асыру да бар. Осыны айт­қан министр: «Бөлінген 1 трлн қаржының шамамен 970 млрд теңгесі аймақтарға бөлін­ді. Бағдарлама әлеуметтік, көлік­тік инфрақұрылымды, тұрғын үй-коммуналдық шаруа­шы­лықты жаңғырту және елді мекендерді жақсарту арқылы жұмыс орындарын құруға бағытталған. Сонымен қатар жаңа нысандардың құрылысы қарас­тырылған. Бұл – 147 әлеу­меттік нысан, 56 тұрғын үй мен жатақхана, 75 сумен жабдықтау нысаны, 33 газбен жабдықтау нысаны, 42 электрмен жабдықтау нысаны және т.б. Сондай-ақ 2,5 мыңнан астам әлеуметтік нысан 73 мың жұмыс орнын ашу арқылы қайта құрылады. Бұл – мектептер, ауруханалар, спорт кешендері, мәдениет үйлері. Тұрғын үй-коммуналдық ша­руа­шылықтың 979 нысаны жаңғыртылады. Бұл – сумен жабдықтау, жылумен жаб­дықтау және су бұру жүйелері сияқ­тылар. Мұнда шамамен 40 мың жаңа жұмыс орны құрылады», деген Д.Абаев жалпы 7 мыңнан астам жоба іске қосылып, 240 мыңға жуық жұмыс орны ашылатынын атап өтті.

Тәртіпке бағынған құл болмайды

Төтенше жағдай ережелерін сақтамаған тұрғындардың әлі де табылып жатқанын жеткізген ведомство басшысы әсіресе жалған ақпарат таратушылардың қатары көп екенін айтты. «Қазір коронавирусқа қатысты фейк жаңалықтар өте көбейіп кетті. Азаматтар өздері де байқамай ескі видеоларды, басқа елдерде болған оқиғаларды бізде болған деп ойлап, таратуда. Әртүрлі жалған аудиожазбалар тарап жатыр. Оған кейбір адамдар сенуде. Мұның барлығы қоғамда үрей туғызады. Сондықтан тағы да қайталап айтамыз, тек ресми ақпарат көздерін қараңыздар. Сол жердегі мәліметке ғана сеніңіздер. Қазір барлық полиция департаменттерінде осындай жалған ақпараттарды және оны жариялаған адамдарды анықтайтын арнайы жұмыс топтары бар», деді ол. Бүгінде елімізде осындай дерек бойынша 41 іс қозғалып, тергеу жүргізіліп жатқанын жеткізген Д.Абаев барлық кінәлі адамдар заңға сәйкес жазаланатынын айтты.

Кеше кешкі мәліметке сүйенсек, еліміз бойынша коронавирус жұқ­тыр­ған 569 жағдай анықталды. Оның көбі Нұр-Сұлтан (219 адам) мен Алматы (115 адам) қалаларында тір­келген. Ал Шымкент қаласында ауру жұқ­тыр­ғандардың саны – 13 адам. Облыстарға келер болсақ: Ақмола облысы – 23, Ақтөбе облысы – 10, Алматы облысы – 10, Атырау облысы – 23, Шығыс Қазақ­стан облысы – 5, Жамбыл облысы – 28, Батыс Қазақстан облысы – 2, Қара­ған­ды облысы – 31, Қостанай облысы – 1, Қызылорда облысы – 31, Маңғыс­тау облысы – 3, Павлодар облысы – 1, Солтүстік Қазақстан облысы – 25, Түр­кістан облысы – 29 адам. Қазірге дейін 36 науқас жазылып шықты. Ал қайтыс болғандардың саны алты адамға жетіп отыр.

Коронавирустан қайтыс болған алтыншы адам Шымкент қаласында тіркелді. Шымкент қалалық Денсаулық сақтау басқармасының хабарлауынша, 1964 жылғы науқас Түркістан облысының тұрғыны. Ол халықаралық жүк көлігінің жүргізушісі болып жұмыс істеген. Соңғы апта ішінде Ресейден Алматыға 1988 жылғы ұлымен бірге келе жатқан жолда дене қызуы көтеріліп, ауырған. 3 сәуірде Шымкент қаласы қалалық жұқпалы аурулар ауруханасына жеткізілген науқастан коронавирус анықталып, жағдайы өте ауыр болған. Ол қарқынды терапия жүргізілгеніне қарамастан 5 сәуір күні сағат 03:50-де қайтыс болды. Ал қазіргі уақытта ұлы Алматы қаласында стационарлық карантинге оқшауланды.

Айта кетейік, Түркістан облысының әкімдігі облыстағы карантин 17 сәуірге дейін созылатынын жариялады. Ал Жамбыл облысының бас мемлекеттік санитарлық дәрігерінің қаулысымен Қор­дай ауданының аумағында 6 сәуір­ден бастап ерекше талаптары бар шаруа­шылық және (немесе) өзге де қыз­мет­терге, тұрғындар тіршілігіне каран­тин режімін енгізу туралы шешім қабылданды.

Инфографиканы жасаған Амангелді ҚИЯС, «ЕQ»