Батыс Қазақстан облысында коронавирус індетіне байланысты эпидемиологиялық ахуал бақылауда, деп хабарлайды облыстық тауарлар мен көрсетілетін қызметтердің сапасы мен қауіпсіздігін бақылау департаменті басшысының орынбасары Нұрлыбек Мұстаев.
11 мамырға дейін Батыс Қазақстан облысы аумағында коронавирус инфекциясымен ауырған 252 адам тіркелген екен. Оның 80,3%-ы, яғни 203 адам індетті басқа жақтан жұқтырып келген. Таратып айтсақ, Ресей Федерациясынан – 158 адам, Германиядан – 1, Атырау облысынан – 44 адам ауырып келген. Соның ішінде 43 адам – «Теңізшевройл» компаниясының жұмысшылары. Сондай-ақ транзиттік жүк тасымалдалымен айналысатын жүргізушілер арасынан Өзбекстан Республикасының – 4, Тәжікстанның – 2, Қырғызтанның – 1 азаматы індет жұқтырып, Оралдағы жұқпалыаурулар ауруханасында емделіп шықты.
Бұдан бөлек, жоғарыдағы науқастармен қарым-қатынаста болып, індет жұқтырған батысқазақстандықтардың саны – 49 болған. Мұның басым көпшілігі, яғни 41-і – медицина қызметкері. Облыста 100 мың тұрғынға шаққанда сырқаттанушылық көрсеткіші 38,4 құраған.
- Бүгінгі таңда «Теңізшевройл» компаниясынан облысымызға 2050 азамат келді. Қазір 1195 адам үй жағдайында оқшауланған, оларға дәрігерлер күн сайын қоңырау шалып, хал-жағдайын біліп отыр. 561 адамда инкубациялық кезең аяқталды, - дейді Нұрлыбек Мұстаев.
Бүгінге дейін Батыс Қазақстан облысында індеттен 96 адам жазылып шықты. Олар ауруханадан шыққан соң тағы 14 күн бойы үй оқшаулауында, медициналық қызметкерлердің бақылауында болады.
Батыс Қазақстан