Елімізде бүгінде бірінші кезекте білім саласына тиісті көңіл бөлінуде. Мемлекеттің аталған салаға деген қамқорлығын еліміздегі әрбір өңір жақсы сезінуде. Білім саласы күрделі сала болғандықтан, мұнда сол саланың басы-қасында жүрген басшылар мен қосшыларға да артылар жауапкершілік жоғары.
Жамбыл облысында жаңа оқу жылына дайындық жұмыстары өте әлсіз болып шықты. Әуелгіде дайындық шараларына байланысты тиісті басшыларға бірқатар тапсырма берілгенімен, оның дені орындалмаған.
Облыстық білім басқармасының басшысы Гүлнәр Ходжабергенованың айтуынша, бүгінгі таңда өңірде 22 білім беру нысанының құрылысы жүргізілуде. Ал оның ішінде 9 білім нысаны биыл салынып бітуі керек екен. Құрылыс жұмыстарына 10,1 млрд теңге бөлінген. Сондай-ақ 7,7 млрд теңгеге 42 мектеп күрделі жөндеуден өтуде. Білім басқармасы басшысының келтірген мәліметіне қарағанда, облыстағы 32 мектептің жөндеу жұмыстары биыл 30 тамызға дейін, ал қалған 6 білім ошағындағы күрделі жөндеу жұмыстары тек 30 қыркүйекте ғана аяқталмақ. Яғни жаңа оқу жылының басталғанына аз ғана уақыт қалғанына қарамастан, жұмыстар кешіктірілуде. Бұл ретте облыс басшылығы тарапынан аудан әкімдеріне сын да айтылған болатын. Аудан әкімдері өз аудандарындағы мектеп құрылысының жайын жіті бақылап отырған жоқ. Сонымен қатар мердігерлердің де сылбыр жұмысы жаңа оқу жылына дайындыққа қолбайлау болды. Сондықтан да мектептері әлі пайдалануға берілмеген балалар қаланың шалғайында орналасқан мектептерге барып оқуға мәжбүр. Алайда облыстық білім басқармасының басшысы Гүлнәр Ходжабергенова нысандардың құрылысы мен жөндеу жұмыстарының созылып кетуін жұмысшылардың жетіспеушілігімен түсіндірді. Ал облыс әкімі Бердібек Сапарбаев аталған мәселе бойынша өткен жиында мектеп құрылысына және күрделі жөндеуге байланысты жағдайлар әуелден-ақ облыстық құрылыс басқармасы мен аудандық құрылыс бөлімдерінің бақылауында болуы керек екенін айтқан болатын. «Егер жұмыс барысын қадағаламаса, техникалық қадағалау не үшін қажет? Жалпы тапсырмалар не үшін беріледі? Егер құрылыс басқармасы өз жұмысын жүргізе алмаса», деген еді әкім.
Білім беру саласындағы тағы бір маңызды мәселе – сырттағы мектеп дәретханаларына қатысты. Былтыр Тараз қаласында орын алған оқушы қызды зорлау әрекетінен кейін осындай шешім қабылданған болатын. Облыс әкімінің тапсырмасы бойынша, оның бәрі биыл 1 қыркүйекке дейін мектеп ғимараттарына енгізілуі керек болған. Бұл мақсатқа 1,1 млрд теңге бөлінген. Бірақ осы уақытқа дейін облыс мектептеріне қатысты 285 дәретхананың тең жартысы ғана көшірілген болып шықты. Бұл орайда Байзақ, Қордай, Меркі және Шу аудандары айтарлықтай артта қалып отыр. Аталған аудандарға ақшаның жеткілікті деңгейде бөлінгеніне қарамастан, жұмыс сылбыр жүргізілуде. Сондай-ақ дәретханалардың талапқа сай салынбауы да қатаң сынға ұшырауда. «Мен аудан әкімдерінің қалай тыныш ұйықтайтынын түсінбеймін. Олардың орнында болсам, желтоқсан айында балалардың күн сайын көше дәретханаларына қалай баратындарын ойланатын едім. Бұл балалардың алдында ұят», деген болатын Б.Сапарбаев. Сонымен қатар облыстағы барлық мектептерге бейнекамералар орнату да күн тәртібіндегі мәселенің бірі болып отыр. Бүгінгі таңда өңірдегі білім беру ошақтарындағы бейнекамералардың 80 пайызы ескірген. Енді оны сандық камераларға ауыстыру мәселесі тұр.
Ал биыл жаңа оқу жылының басында қашықтан оқыту тәртібі болғандықтан, оқушыларды компьютермен қамтамасыз ету де маңызды мәселенің бірі. Облыстағы 234 мың 715 оқушының тек 57,4 пайызында ғана дербес компьютер мен ноутбук бар. Ал 99 мың 852 оқушының, яғни олардың 42,5 пайызының компьютерлік техникасы жоқ болып отыр. Жыл басынан бері облыс мектептері үшін 2 658 компьютер сатып алынған. Енді жыл соңына дейін 30 мыңнан астам компьютер сатып алу жоспарлануда. Сонымен қатар облыстың 130 елді мекені интернетпен қамтылмаған. Ал интернетсіз елді мекендерде 123 мектеп бар. Онда 18 мың 937 оқушы оқиды. Бұл да өңірдегі тиісті аудан әкімдері мен білім саласы басшыларының жұмысының жүйесіздігін көрсетеді.
Жамбыл облысы