Екінші толқынды тойтаруға дайынбыз ба?

Мемлекет басшысы биылғы Жолдауында коронавирус инфекциясы салған лаңнан кейінгі жағдайды былайша сипаттады: «Қазір әлем соңғы 100 жыл ішінде болмаған аса күрделі дағ­дарысты бастан өткеруде. Сарапшылардың айтуынша, жаһандық экономиканы қайта қалпына келтіру үшін кемінде 5 жылға дейін уақыт қажет». Ұға білген адам үшін бұл сөздердің астарында алапат салмақ жатыр. Яғни біз үшін қатаң сынақ енді басталғандай.

Ел ішіне ендей кірген індет осал тұстарымыздың біз ойла­ғаннан әлдеқайда орасан екенін көрсетті. Қарап тұрсақ, біздегі медицина саласындағы мәселе атаулы кадр тапшылығынан бастап қарапайым дәрілердің жетіспеушілігіне дейін тізбекте­ліп жатыр екен. Содан да болар, Мемлекет басшысы өзінің Жол­дауында еліміздегі медициналық инфрақұрылымды дамытуды аса маңызды шаруа­ның бірі деп атады.

Ең өкініштісі сол, пандемия­ның күшейіп тұрған кезінде ауылдық жерлерде тұратын қара­пайым адамдар тіпті де қор­ған­сыз қалды. Бақсақ, алыстағы ауылда дәрі-дәрмекті былай қой­ғанда, ауырған адамға жәр­дем беретін медициналық ма­ман­дардың жетіспеушілігі және жоқтығы жаға ұстатты. Осы­ның кесірінен облыс, аудан ор­талықтарынан жырақта ор­наласқан ауылдардардың қан­шама тұрғыны өмірмен мезгі­лінен бұрын қош айтысып кетті десеңізші?!

Бұл өте үлкен және күрделі мәселе еді. Міне, осы жайттың жоғары жаққа жеткенін өз басым жақсылыққа баладым. Президент Жолдауда: «Шалғайдағы өңір­лер­ге көлік арқылы дәрігер­лік қызмет көрсету ісін қайта қалпына келтіру шараларын жүзеге асырған жөн. Денсаулық сақтау ісінің тиімді моделін құру арқылы үш жыл ішінде барлық ауылдық елді мекенді фельдшерлік-акушерлік пункттермен және дәрігерлік амбулаториялармен қамтамасыз ету қажет», деді.

Бүгінде әлем халқы коронавирус инфекциясының екінші толқынын үлкен үреймен күтіп отыр. Егер де, мамандар айтқан болжам расқа шықса, онда біз аты жаман тұмауға тосқауыл қоюға дайынбыз ба? Міне, жүрегі шайлығып қалған халықты қазір осы мәселе қатты алаңдатады.

Осы орайда тағы да ауылдық жерлерде тұратын азаматтардың жайын ойлап, алаңдаймыз. Ірі қалалар мен аудан орталықтары карантинге жабылар болса, ауыл халқының ауыр жағдайымен бетпе-бет қалары сөзсіз. Бұл тығырықтан шығар жолдың бірі – осы бастан дәрі-дәрмектің мол қорын жасап, оның қолже­тімділігін қамтамасыз ету керек. Мысалы, коронавирус күшіне мініп тұрған кезде Қарағанды облысының Ақтоғай және Ұлы­тау аудандарында жылжымалы дәріханалар жұмыс істеді. Дәрі-дәрмек тиеген бұл автокөліктер алыстағы ауылдарды аралап, қолы қысқа қарапайым халықтың мұқтажын ашты. Іс жүзінде нәтиже берген осы тәжірибе өңірлерге кеңінен таратылса деген тілек бар. Сонымен қатар ел ішіне індет қайта кірер болса, темір жолды пайдаланып, денсаулық вагондарының да көмегіне жүгінуге болушы еді.

Қалай болған күнде де, COVID-19 алғаш келгенінде бетін ашқан  кемшіліктермен күрес әсте тоқтамауы тиіс. Әрине, індетпен күресте алғы шепте жүріп, қауіпке қарсы тұратын медицина қызметкерлері. Мемлекет басшысы Жолдауда дәрігер маман­дығын материалдық тұрғы­дан нығайта түсудің маңыз­дылығын атап өтті. «Бюджетті таяу­дағы нақтылау кезінде екінші жартыжылдықта меди­цина қызметкерлерін ынталандыратын қосымша төлем үшін 150 миллиард теңге бөлуді тапсырамын», деді Президент. Со­нымен бірге ол 2023 жылға қа­рай дәрігерлер еңбекақысының экономикадағы жалақыдан екі есе артық болатынын да мәлімдеді. Әлбетте, мұның бәрі медицина қызметкерлерінің мерейін өсіріп қана қоймай, оларға зор жауапкершілік  жүктейді деген сенімдеміз.

Сөзімді түйіндер болсам, коронавирустың келесі толқы­ны­на тек жағдайы кешенді түрде жасалған медицина ғана тойтарыс бере алады. Бұл дегеніңіз – ең алдымен білікті маман, заманауи медициналық инфрақұрылым және қолжетімді дәрі-дәрмектің жеткілікті қоры.

Бекзат АЛТЫНБЕКОВ,

облыстық мәслихаттың депутаты, облыстық Қоғамдық келісім кеңесінің төрағасы, Nur Otan партиясы Саяси кеңесінің мүшесі

Қарағанды облысы