Бұл күндері Пиреней түбегінде өтіп жатқан «Испания Вуэльтасы» көпкүндігінің 14-кезеңі бельгиялық велошабандоз Тим Велленстің жеңісімен аяқталды.
«Lotto Soudal» клубы сапында өнер көрсететін аталған спортшы Луго мен Оренсе қалалары аралығын қамтыған 204,7 шақырымдық қашықтықты 4 сағат 37 минут 05 секундта жүріп өтті. Екінші және үшінші орындарды канадалық Майкл Вудс («EF Pro Cycling») пен чехиялық Зденек Штыбар («Deceuninck-Quick Step») иеленді. «Астананың» велошабандоздары арасында ең тәуір көрсеткішке Александр Власов қол жеткізді. Ол 24 сатыға табан тіреді. Бір айта кетерлігі, ресейлік легионер 23-кезеңде де дәл осындай нәтижеге иек артқан болатын.
Жалпы есептегі жағдай айтарлықтай өзгерген жоқ. Әлі де «Team Jumbo-Visma» клубының серкесі Примож Рогличке тең келер ешкім табылар емес. Словениялық спортшының уақыты – 53:57:05. Эквадорлық Ричард Карапас («INEOS Grenadiers») екінші және ұлыбританиялық ХьюКарти («EF Pro Cycling») үшінші сатыға жайғасты. Ал қазақстандық команданың мүшесі Александр Власов тоғызыншы орнын сақтап қалды.