Өңірде карантиндік шектеулер күшейтіліп, 7 қараша сағат 00.00-ден бастап санитарлық бекеттер жұмыс істей бастайды. Кешкі 21.00-ден таңғы 06.00-ге дейін көшеде жүруге тыйым салынды, демалыс күндері локдаун сақталады. Бұл жөнінде өңірдің бас санитарлық дәрігері Айнагүл Мусина өңірлік коммуникациялар қызметінде өткен брифингте мәлімдеді.
Облыста коронавирус бойынша жағдай күрделене түсті. Індет басталғаннан 2 қарашаға дейінгі статистикалық мәліметтер бойынша облыста лабораториялық жолмен анықталған 3 805 оқиға тіркеліпті. 1 қазан мен 2 қараша аралығында 318 адам аты жаман індетке шалдыққан. Оның 184-і – Көкшетау қаласының, 29-ы – Бурабай ауданының, 27-сі – Степногор қаласының, 48-і – Біржан сал ауданының, 10-ы – Атбасардың, 10-ы қалған аудандардың тұрғындары.
Оқушылар арасында 19 баладан індет лабораториялық жолмен анықталса, мектепке дейінгі мекемелерде 11 балдырған мен 2 тәрбиеші аталған індетке шалдыққан. Облыстағы коронавирустың таралу жағдайы бойынша мәлім болған көрсеткіштерге көз жүргіртсек, жағдай өте күрделі. Өткен аптада індетті жұқтыру өсімі 2,2 пайызды құрады. Соңғы үш аптада Көкшетау қаласының тұрғындары арасында COVID-19 ауруының өсімі 3,5 есе ұлғайған. Алдыңғы аптада Біржан сал ауданындағы «Семізбай-У» кен орнында 43 адамнан коронавирус жұқпасы анықталып, қазіргі уақытта барлық кенші карантиндік госпитальде ем қабылдауда. Облыстың бас санитарлық дәрігерінің мәлімдеуінше, онда қазір соңғы дезинфекциялық жұмыстар жүргізіліп жатыр.
– Облыста індеттің таралу жағдайы күрделене түсті. Қазір біздің өңір эпидемиялық ахуал бойынша жасыл деңгейге кірді, сондықтан карантин талаптарын қатаңдату қажет. Санитарлық бекеттер карантин аймағына кіру және шығу пункттерінде орнатылады, – дейді А. Мусина.
Сонымен, облыстың бас мемлекеттік санитарлық дәрігерінің 3 қарашадағы қаулысына сәйкес биыл 7 қарашадан бастап карантиндік шектеулер күшейтіледі. Көкшетау қаласының жан-жағынан санитарлық бекеттер орнатылып, демалыс және мереке күндері қалаішілік қозғалыс көліктері тоқтатылады.
Брифинг соңында өңірдің бас санитарлық дәрігері тұрғындардан санитарлық талаптарды сақтап, әркім өзінің және жақындарының денсаулықтарын қадағалап, карантинге түсіністікпен қарауға шақырды.
Алғашқы толқыннан әупірімдеп өткеннен кейін ел баяғы мамыражай қалыпқа түскен. Облыс орталығындағы мейрамханаларда үйлену тойлары, құдалық, жаназа асы өткізіле бастады. Мейрамхана иелері қулыққа басқан. Есік-терезені тұмшалап, көз байланған уақытта жарық көрінбейтіндей етіп жасырды. Бірақ біз жасырғанмен, індет жасырынбайды екен. Есіктен сығалап төрге озды. Тексеру көбейген соң сәл тыйылғандай болды. Осы кезде коттедждерін жалға беретіндердің айы оңынан туып, қатерлі кәсіптерін үдете бастады. Жаназаға барушылар да бәз-баяғы қалпында. Өздерінің санитарлық талапты бұзған әрекеттерін бармай қалсақ ұят боладымен ақтағандардың соңы індеттің өршуіне әкелді. Егер барлық талап сақталса, жаман тұмау бүгінгідей өршімес пе еді, кім білсін?!
Ақмола облысы