Кеншілер астанасында Қарағанды облыстық Қазақстан халқы Ассамблеясы аналар кеңесінің бастамасымен «Ананың аялы алақаны» атты жәрмеңке ұйымдастырылды. Бұл іс-шарада 15 көпбалалы ана қолдан жасалған бұйымдарын, дәмді тоқаштар мен тұздалған көкөніс түрлерін көпшілік қауымға ұсынды.
Мұндағы тауарлардың бәрі де ізгі ниетпен жасалып, шын жүректен ұсынылған деп нық сеніммен айтуға болады. Мысалы, іс-шара барысында көпбалалы ана Жанар 50-ден астам банка тұздалған көкөніс әкелсе, жас ана Дильназ ұлымен бірге бес түрлі 300 торт сатты.
Жәрмеңкеде көпбалалы ана, аналар кеңесінің мүшесі, «Ұлы даланың ұлттық құндылықтары» фестивалінің Гран-при иегері Бақытты Қанапинованың қолымен дайындалған қазы, шұжықты да сатып алуға мүмкіндік туды.
Сонымен қатар мұнда тек аспаздық өнімдер ғана емес, сондай-ақ аналардың қолымен тігілген футболкалар, белдемшелер, тәпішкелер, тіпті медициналық маскалар да бар.
Жоба бастамашыларының бірі, аналар кеңесінің төрайымы, отставкадағы подполковник Жанар Кенжеғалиева мұндай іс-шараның басты мақсаты әйелдердің өзін-өзі танытуына қолдау көрсету және ынталандыру екенін айтады. Бұдан бөлек, жәрмеңке аясында әйелдерге өз деңгейін көтеріп, жан-жақты дамуы үшін семинар-тренингтер мен оқыту шеберлік сыныптары өткізіледі.
ҚАРАҒАНДЫ