Жаңа оқу жылы басталғаннан бері кезекші сыныптарда білім алып жатқан 302 оқушы COVID-19 инфекциясын жұқтырған. Қазіргі таңда Қазақстан бойынша 456 бала коронавирустан емделіп жатыр. Бұл туралы Президент жанындағы орталық коммуникациялар қызметінде ІІ тоқсанға қатысты өткен брифингте айтылды.
Жиында бірінші болып сөз алған Білім және ғылым вице-министрі Рүстем Биғари 16 қарашада мектептерде ІІ тоқсанның басталғанын айта келіп, алдымен І тоқсанның нәтижелеріне қысқаша тоқталды.
«І тоқсанда миллионнан аса бала аралас форматта білім алды. 2,3 млн бала қашықтан оқыды. Айта кетейін, 82 млн-нан аса баға онлайн режімде қойылды, 40 млн-ға жуық үй тапсырмасы мен бақылау жұмысы берілген. Білім беру жүйесінде 2 млн-нан аса ата-ана, 3 млн білім алушы жұмыс істеді. Сонымен қатар сабақты өткізудің қосымша тәсілдерінің бірі ретінде видео сабақтар қолданылды», деді Р.Биғари.
Брифингте белгілі болғандай, Қазақстан аумағында коронавирус инфекциясының алдын алу мен таралуына жол бермеу жөніндегі ведомствоаралық комиссиясы, сондай-ақ Бас мемлекеттік санитарлық дәрігердің қаулысы негізінде оқыту форматы анықталды. Біріншіден, мектепалды, 1-4 сынып оқушыларының кезекші сыныптарына 5-сынып қосылды. Екіншіден, контингенті 5-300 оқушыны құрайтын мектептерге штаттық режімде оқытуға рұқсат берілді. Үшіншіден, халықаралық мектептерде 1-7 сыныптар дәстүрлі форматта оқытуға көшірілді.
«Жасыл аймақтағы өңірлерде неліктен оқытуды дәстүрлі форматқа көшірмеске?» деген сауалға аталған баспасөз жиынында Қазақстанның Бас санитар дәрігері Айжан Есмағамбетова:
«Нормативтік-құқықтық актілерде жазылған және КВИ таралуының алдын алуға бағытталған ережелер мектептерде сақталмаса, бәрі бекер. Мектептегі балалар осы талаптардың барлығын орындайтынына сену өте қиын десем, барлығы келісетін шығар. Климаттық жағдайларға қарай желдету үшін барлық жағдайларды жасау да кейде мүмкін емес. Көп жерде терезелер ашылмайды. Бұл жағдайда вентиляция жұмысы қауіпсіз ауа алмасуды қамтамасыз ете алады. Желдету – алдын алу шараларының бірі, алайда оны жылыту маусымына байланысты сақтау қиынның қиыны. Осы шаралардың барлығын және көрсеткіштерді ескере отырып, дәстүрлі оқытуға ауысу немесе ауыспау туралы шешім қабылданады. Сонымен қатар нақты елді мекендегі эпидемиялық жағдайға байланысты да өңірдің бас санитарлық дәрігері рұқсат беруі мүмкін», деп жауап берді.
Ал үшінші спикер, Мектепке дейінгі және орта білім комитетінің төрайымы Майра Мелдебекова ата-аналардан түскен тоқсандық жиынтық бағалау (ТЖБ) бөлім бойынша жиынтық бағалаудың (БЖБ) қиындығына қатысты шағымдарға:
«Техникалық ерекшеліктер бойынша бағалау жүйесін тікелей пән мұғалімі дайындайды. Жалпы, біз әдістемелік ұсыныстарда көп тапсырма болмас үшін нақты уақыт пен күрделілікті белгіледік. Бастауыш сыныптарда 1-2 тапсырма беріледі. Егер бұл мектеп қашықтан оқитын болса, онда БЖБ мен ТЖБ ақпараттық жүйелер немесе «Күнделік.кз», сондай-ақ «Дарын онлайн» немесе «Bilim Land» секілді басқа да платформалар арқылы өткізілуі мүмкін. Кері байланыс үшін қандай ақпараттық жүйені қолданса, соны БЖБ және ТЖБ үшін де пайдалануға болады. Ал тапсырмалардың нақты көлемі көрсетілген. Сондықтан мұғалімдер бұл көлемді тікелей ұстануы керек және тапсырма күрделі болмауы тиіс», деді.
Қоса кетейік, ІІ тоқсандағы бөлім мен тоқсан үшін жиынтық бағалауды өткізу мерзімін министрлік белгілеп, бекіткеннен кейін мектептерге жібереді.