Тұңғыш Президент – Елбасы кітапханасы музейінде «Туған жерім» XV халықаралық бейнелеу өнері байқауының көрмесі өтті. Аталған жоба жас суретшілердің шығармашылық әлеуетін арттыруға, балалар шығармашылығын насихаттауға бағытталып отыр.
Жиынды ашқан Елбасы кітапханасының директоры Әмірхан Рахымжанов биылғы кезеңнің тек қазақстандықтар үшін ғана емес, күллі әлем халқына оңайға соқпағанын, әйтсе де қалыпты жағдайға бет бұрып келе жатқанын тілге тиек етті.
Байқауды Елбасы кітапханасы, «Байта» қоры, «Құланшы» орталығы және Нұр-Сұлтан қаласының Балалар көркемсурет мектеп – ЮНЕСКО клубы бірлесе ұйымдастырды. Қазылар алқасына Қазақстаннан бөлек, Ресей, Татарстан, Башқұртстан, Өзбекстан, Украина, Әзербайжан және Беларусь елдерінен 400-ге жуық туынды ұсынылды. Жеңімпаздарға диплом мен естелік сыйлық табысталды.
«Өнерлі балақайларға қолдау білдіргендеріңіз үшін алғыс білдіргім келеді. Біз осы балалардың бір арманын орындадық. Енді олар өз күштеріне сеніп, одан әрі ұштала түсетіндігіне кәміл сенімдімін», деп атап өтті «Байта» қорының жетекшісі Светлана Махат.
Жоба жұмыс істеп келе жатқан 15 жылдан астам уақыт ішінде дәстүрлі кескіндеме, графика, мүсіннен бастап сәндік-қолданбалы өнердің түрлі салаларына дейін жұмыстарды қарастырды. Жас таланттарға олардың Отан туралы түсініктерін, дәстүр сабақтастығын, өз халқының мәдени ерекшелігін көрсететін тақырыптар ұсынылды.
«Туған жерім» байқауының маңыздылығы мен танымалдылығы жайлы 15 жылдық тарихының өзі айтып тұр. Жыл өткен сайын ауқымы кеңейіп, қарқынды дамып келеді. Жаһандық пандемияға қарамастан, осы көрмені Тұңғыш Президент музейінде өткізу арқылы біз өнерге ешқандай тұсау жоқ екендігіне тағы бір көз жеткізіп отырмыз», деді «Құланшы» заманауи өнер орталығының кураторлық кеңес төрайымы.
Байқау лауреаттарының жұмыстары қалың көрерменге желтоқсан айында ұсынылады. Көрмеге келушілер түрлі елдердің жас суретшілерінің өнер туындыларын көріп, тамашалай алады. Көрме 2021 жылдың 25 қаңтарына дейін жалғасады.