Бүгін түнгі сағат 00.00-де жарияланған Exit poll нәтижесі бойынша Қазақстандағы Парламент Мәжілісі депутаттарының сайлауында Nur Otan партиясы жеңіске жетті. Саяси ұйым сайлаушылардың 71,97 пайызына ие болған.
10 қаңтар күні сайлау учаскелерінен шыға берісте азаматтарға сауалдама – Exit poll жүргізген «Қоғамдық пікір» ғылыми-зерттеу институтының директоры Айнұр Мәжитованың хабарлауынша, Nur Otan-нан кейінгі орын «Ақ жол» демократиялық партиясына бұйырған. Аталған партияға сайлаушылардың 10,18 пайызы дауыс берген. Үшінші орынға сайлаушылардың 9,03 пайыз дауысына ие болған «Қазақстан Халық партиясы» жайғасты. Сонымен қатар сайлаушылардың 5,75 пайызы «Ауыл» халықтық-демократиялық патриоттық партиясын, ал 3,07 пайызы ADAL партиясын таңдаған.
– Институттың интервьюерлері 600 сайлау учаскесінде сауалнама өткізді. Оның 316-сы – қалада, 284-і ауылда орналасқан. Сауалдама Нұр-Сұлтан, Алматы, Шымкент қалаларын, барлық облыс орталықтарын, аудандық маңызы бар қалаларды, шағын қалалар және ауылдық елді мекендерді қамтыды. Күні бойы сауалдаманың төрт толқыны өткізілді. Нәтижесінде, 24 мың сайлаушы қамтылды. Сауалдаманың 2 пайызынан қателік кетті. Жалпы, бұл жұмысқа 600-ден астам интервьюер атсалысты, – деп хабарлады Айнұр Мәжитова Орталық коммуникациялар қызметінде өткен брифингте.
Оның айтуынша, Exit poll zakon.kz ақпараттық порталының тапсырысы бойынша жүргізілген. Қазақстан Республикасының «Сайлау туралы» Заңының 28-бабына сәйкес «Қоғамдық пікір» институты сайлауалды әлеуметтік сауалдама және Exit poll-ды жүргізу ниеті туралы Орталық сайлау комиссиясын хабардар еткен.
– Сайлаушыларға сауалдама Exit poll-дың халықаралық әдістемесі бойынша жүргізілді. Респонденттерге «Қазақстан Республикасының Парламенттік сайлауында қай партияға дауыс бердіңіз?» деген бір ғана сұрақ қойылды, – деп нақтылады Айнұр Мәжитова.