24 ақпан күні түнге қарай Мұғалжар ауданы Мұғалжар елді мекеніндегі жеке тұрғын үйде газ баллоны жарылып, осы үйдің 11 жастағы баласы оқиға орнында қайтыс болды. Қазіргі уақытта 52 жастағы үй иесі мен оның 22 жастағы үлкен баласы облыстық жедел жәрдем ауруханасында жатыр. Қайғылы оқиғаға үй иесінің далада аязда сақталған 50 литрлік газ баллонын үйге кіргізуі себеп болған. Тығыздалып толтырылған жабық ыдыс бір жарым сағаттан кейін жарылысқа әкеп соқтырған.
Осы оқиғадан екі күн өткенде, 27 ақпанда Темір ауданы Саркөл ауылының екі тұрғыны өз үйінде газдан уланып қайтыс болды. Ақпанның 25-і күні Хромтау ауданының Көктау ауылының екі тұрғыны газдан уланып, аудандық аурухананың жансақтау бөліміне жатқызылды. 3 қаңтарда Қобда елді мекеніндегі тұрғын үйде бес литрлік газ баллоны жарылып, лезде үй өртке оранған. Өрттен осы үйдің екі адамын күйік шалған. Олар қазір Қобда аудандық ауруханасында ем алып жатыр. Бұл оқиғаға да тығыздала толтырылған сұйықтықтың жылу қысымынан көлемі артып, ыдысқа сыймауы себеп болды. Дәл осы күндері Ырғыз елді мекеніндегі бір үйде де 5 литрлік газ баллоны жарылып, іле-шала үйден өрт шыққан. Бұл оқиғалар бір-бірімен өте ұқсас, бәрі де жеке адамдардың аязда қатып тұрған газ баллондарын үйге кіргізгеннен кейін орын алды. Газ баллондарының барлығы да автокөлікке газ құю бекеттерінде толтырылған екен. Облыстық Төтенше жағдайлар департаменті мамандарының алдын ала жасаған қорытындысы осы жағдайларды анықтапты.
Егер мамандандырылған газ құю бекеттерінде тұрмыстық мақсатта қолданылатын газ баллондарын толтыру ережесі қатаң қадағаланса, көліктерге газ құю бекеттерінде бұл тәртіп сақтала бермейді. Көлікке газ толтыруды жанармай құюмен бірдей санайтын операторлар жұрттың қолындағы баллондарды аузы-мұрнына дейін толтырып береді. Мұның артын ойлап жатқан ешкім жоқ. Жыл басталғалы төрт адамның өлімімен аяқталған осы оқиғалар газ құю бекеттерінің жұмысын мұқият тексерістен өткізуді күн тәртібіне қойып отыр.
Оның үстіне, көпшілік тұрғындар газды сақтау мен оны пайдалану нұсқаулықтарын орындай бермейді. Газ баллондарын жылыту құрылғыларына жақын жерге қоюға, көп пәтерлі үйдің балконында сақтауға болмайтынын көпшілік білсе де орындамайды. Осыдан көрініп тұрғандай, екі айдың ішінде төрт адамның ажалына себеп болған оқиғаларда адамдардың салғырттығы мен газ құятын мекемелердің жауапсыздығы жатыр. Сондай-ақ облыстық Төтенше жағдайлар департаментінің мамандары газбен жүретін автокөлік ішінде тұтанған өрт оқиғаларының жиілегенін хабарлайды. Оған көбінесе автокөліктердің газ құятын бөліктеріндегі ақаулар себеп болған.