Жылудың жыры жылда жалғаса бере ме?

Оның өзінде «бесқонағы», «отамалысы» бар... Әлі қайда, ауылдағы ағайын от жағып, пеш түбінде отыр. Ал семейлік тұрғындар жылуға тағы жарымады. Жылу қазандығының құрылысы басталмай, көпшіліктің көтерген бұл мәселесі, әй, шешіле қоймас...Естеріңізде шығар, 2015 жылы Семейдің жылу жүйесін жөн­деу үшін мемлекеттің қазы­насынан бақандай 35 млрд теңге бөлінген еді. Аз қаржы емес. Алайда мәселе түбегей­лі оңалмады. Биыл қосымша 5 млрд теңге бөлу көздел­ген. Тәуел­­сіз сарапшылардың пікі­рін­­ше, Семейдегі 17 қазан­дық толығымен жаңартылмай, көп қабатты тұрғын үйлер­ге жылу жөнді тарамайды, ал мұр­жа­лардан шығатын зиянды қалдық­тардың мөлшері арта береді.  

– Қазандықтарды жөн­деу мақ­сатында қаржы бөлін­гені­мен, мәселе сол күйінде қа­лып отыр. Бә­рі қаусап біткен. То­зып тұр. Ал оның шешімі баяғы­дан бел­гілі: қаланың оң жаға­лауы­на іргетасынан бастап зама­науи жылу қазандығын көтеру қа­жет. Бұл ұсақ-түйек қазан­дық­­тар­дың жұмысын бір өзі-ақ атқа­ра­тындай болуы тиіс, – дейді қоғамдық кеңестің мүшесі Николай Исаев.

Қоғам белсенділерінің айтуынша, 1980 жылдары жылу электр стансасының құры­лы­сы басталғанымен, аяқ­сыз қал­ған. Жалпы, жылу стансасын салу жоспары бертінгі жыл­дары да қарастырылған. Ауқым­ды жобаны жүзеге асыру үшін би­лік өкіл­дері ин­вестор іздесті­ріп, Энер­гетика министр­лігі түркия­лық компаниямен келі­сім­шарт жа­сасқан екен. Алай­да белгісіз се­беп­тер­ге байла­нысты облыс бас­­шы­­лы­ғы одан бас тартқан көрі­неді. Не се­бепті екенін ешкім тү­сін­­дірген жоқ. Әйтеуір, Семейдің жылуын жылда жыр етіп келеміз.  

– Көктем келгенімен, үй сал­­қын. Қыстың аязына да шы­дадық қой, шыдаймыз. Газет-журналға жазғанмен, үй жылына қояды дейсің бе?! Қабат-қабат киініп отыра береміз, – дейді Т.Рысқұлов көшесіндегі №87 үйдің тұрғыны Мәриям Қызырбекқызы.

Сондай-ақ ол жылуға жарымаса да, аз-маз зейнетақыларының  коммуналдық төлемге кететінін көлденең тартып отыр.    

Тұрғындардың сөзіне қа­расақ, көбі жылу жүйесінің қал­пына келтірілуінен үміт үз­генге ұқ­сайды. Алайда облыс әкімі Даниал Ахметов жылу жүйе­­сіндегі мәселе тү­бегейлі ше­шілетінін айтып сендірген. Жуықта Семейге жұ­мыс сапа­рымен барған өңір басшысы «Жылукоммунэнерго» МКК-ге тиесілі «Ғаббасов», «Ор­та­лық» және «103-103А» қа­зан­дықтарына арнайы ат басын бұрған. Ондаған жылдан бері оң шешімін таппай келе жатқан мәселенің мән-жайын көріп қайтқан әкім тиісті мекемелерге қысқа мерзімде жобалық-сме­талық құжаттама әзірлеуді тапсырыпты. Соған сәйкес «Ор­талық» жылу қазандығына қо­сымша тағы бір қазандықтың құ­рылысы басталатынын айтқан.

Әйтпесе Семейдегі қазан­дық­тардың бөлген жылуынан айып­пұлға бөлген қаржысы көп бо­лып тұр. Мәселен, зиянды қал­дықтарды мөлшерден 30 есе көп шығарғаны үшін Эко­логия министрлігі 40 млн теңгенің айыппұлын салған. Зиянды шы­ғарындылар кө­мірді көп жақ­қандықтан емес, техникалық ақау­ларға байланысты дұрыс жан­бағандықтан ауаға тараған.

– Жылу қазандығының мәсе­лесі жаңа үйлердің құрылысына да кедергісін келтіруде. Негізінен, 2014 жылы қазандықтың жо­балық-сметалық құжаты әзір бо­луы тиіс еді. Енді әбден жауы­р болған бұл мәселені созбай шешу керек. Біле білсек, 2013 жылы Семейге жұмыс сапарымен келген Елбасы да тапсырып кеткен. Одан бері он жылға жуық уақыт өтті, – деді Семей қалалық мәслихатының депутаты Қайрат Смағұлов.

Не де болса, облыс әкімі Даниал Ахметов қаладағы қа­зан­дықтардың мәселесі бір­жола шешілетінін тілге тиек етті. Бірақ жобаның жүзеге асу уақыты тағы белгісіз. Биыл қыс­тан әупірімдеп шыққан біраз тұр­ғын келер қыста да дірдектеп отырмаса игі.