Ұлттық академиялық кітапханада көрнекті жазушы, Мемлекеттік сыйлықтың лауреаты Қажығали Мұханбетқалиұлына арналған оқырман залы ашылды. Салтанатты кеште қаламгердің замандастары оның шығармашылығы мен өмір жолы жайында кеңінен әңгімелеп, қалың көпшілікке оқырман залын таныстырды.
Қазақ әдебиетінде айрықша орны бар жазушының прозалық шығармаларында негізінен жетпісінші, сексенінші жылдардағы ел тіршілігі суреттеліп, қоғамдық ахуал көріністеріндегі қарапайым тұрмыстық эпизодтардың өзінен үлкен әлеуметтік мәселелер ұтымды жеткізіледі. Ал атақты «Тар кезең» романы ұлт тарихындағы ұлы тұлғалардың бірі Сырым Датұлы туралы жазылғаны белгілі.
– Қазақтың көрнекті жазушысы Қажығали Мұханбетқалиұлы ағамыздың атына оқу залының ашылғаны бізді өте қуантып отыр. Бұл – ұлттық академиялық кітапхананың біздің қаламгерлерімізге көрсетіп жатқан құрметі. Кітапханада классик Әбіш Кекілбаевтың, ғалым, әдебиеттанушы Тұрсынбек Кәкішевтің, жазушы Дүкенбай Досжанның, әдебиеттанушы Мырзатай Жолдасбековтің оқу залы бар. Қазақ руханиятына, соның ішінде әдебиетімізге зор үлес қосқан азаматтардың есімі берілген кабинеттер ашылып жатыр. Бұл тек музей ретінде есігі жабық тұратын оқу залдары емес, сырттан келген оқырмандардың барлығы өздеріне керек кітапты қарап, білімге, ғылымға ден қоюға жағдай жасалған дүние, – деді Қазақстан Жазушылар одағы Нұр-Сұлтан қалалық филиалының директоры, ақын Дәулеткерей Кәпұлы. Жазушының жұбайы Сұлуханым Фатихақызы өзінің жары туралы естеліктермен бөлісіп, Қажығали Мұханбетқалиұлының атына ашылып жатқан оқу залы үшін Ұлттық академиялық кітапханаға зор ризашылық білдірді.
Жиынға жазушының жақын досы, жазушы, Мемлекеттік сыйлықтың лауреаты Төлен Әбдік, публицист Ораз Қауғабай, филология ғылымдарының кандидаты Қайрат Сақ, «Алтын Қазына» қоғамдық бірлестігінің төрағасы Ербол Бейілхан және өзге де жастар қатысты.