Қарағандылықтар жаппай егуге қамдануда

Жалпы, облыста вакциналау сынды аса жауапты шаруамен 30 кабинеттен тұратын 14 орталық айналысады. Олар Қарағанды, Теміртау, Абай, Саран, Шах­тин­ск, Балқаш және Жезқазған қала­ла­рында жұмыс істеп тұр. Кейінде Қар­­қа­ралы ауданындағы орта­лық аурухана жанынан тағы бір орталық ашылды.

Алдағы уақытта 35 вакциналау орта­лығы іске қосыл­мақ­шы. Мұнда әрқай­сы­ның өткізу қабілеті тәулігіне 70-80 адамды құрайтын 115 егу каби­неті болады.

Қарағанды облысы 1 сәуір­де аталған вак­ци­на­ның бірінші компонентінің 7 600 дозасын алған. Эпи­де­мио­ло­гиялық жағдай ескеріле оты­рып, бірінші кезекте бұл партиямен медициналық және әлеу­мет­тік мекемелердің тәуекел топ­қа жататын қызметкерлері мен сон­дағ­ы адамдарды вак­ци­на­лау­ға шешім қабыл­да­нып­ты.

– Осы аптаның соңына қарай Қара­ған­ды фарма­цев­ти­ка­лық кешенінде өнді­рілетін Спутник V вакцинасының тағы 40 мың дозасы жеткізілуі тиіс. Сәуір айында тағы да кезекті партиясын аламыз, – дейді Б.Төлегенова.

Қоғамдық денсаулық сақ­тау қызметі­ні­ң басшысы тұр­ғын­дарды жаппай вакциналау сәуір айының ортасында басталатынын айтады. Осы орайда ірі сауда үйлерінде вак­ци­налау орталықтарын ашу ұйғарылған. Бұл жылжымалы бекеттер емес, толыққанды құрылымдар болмақшы. Онда дәрігерлік және егу каби­нет­тері, вакцинадан кейін­гі бақылау және шұғыл көмек аймақтары болады. Олардың бәрі стационарлық меди­ци­налық тоңазытқыштармен және барлық қажетті жаб­дық­­­тар­мен қамтамасыз еті­ле­ді. Қа­зіргі уақытта бұл орта­лық­тар­дың жұмысын үйлес­тіру санитарлық-эпидемия­лық қызметпен бірге пысық­талу үстінде.

Коронавирусқа қарсы вакцина алу ерікті және тегін екенін айта кеткен жөн. Ба­ла­лар мен 18 жасқа дейінгі жас­өспі­рім­дер­ге вакциналау жүргізілмейді. Ал басқа жас­та­ғы адамдарға шектеу жоқ.

Екпе салдыруға ниет біл­дір­ген тұр­ғындар алдымен өздері тіркелген ем­ха­на­ға барып, күту тізіміне жазылуы керек. Егер белгілі бір адам қандай да бір себептермен белгіленген күні вакциналауға келе алмаса, ол міндетті түрде бұл тура­лы хабарлауы тиіс. Өйткені әрбір доза қатаң есепте тұрады. Мысалы, келе ал­ма­ған әлгі адамның кезегі басқаға ауыс­тырылады.

Қоғамдық денсаулық сақ­тау қыз­ме­ті­нің басшысы Б.Төлегенова вакци­на­лау­дың пандемияны тоқтатудың жал­ғыз ғана тәсілі екенін, бұл маңызды шаруаға тұр­ғын­дардың үлкен жа­уап­кер­шілікпен және түсініс­тікпен қараулары керек­тігін айтады.

Еске сала кететін бір жайт, қазіргі уа­қыт­та мамандар жасанды иммунитеттің болғаны абзал деген ұйғарымды жақтап жүр. Мысалы, Спутник V вакцинасын жасап шығарған Н.Гамалея атындағы ұлт­тық зерттеу орталығының ғалым­да­ры өздері жариялаған ма­қа­лаларда им­му­нитеттің қа­лып­тасу үдерісі екі жылға дейін созылатынын мәлім етті.

Соңғы тәулік бойынша жеткен мәлі­мет­­терге сай, Қара­ғанды облысында 144 адам коронавирус инфекциясын жұқ­ты­рып­ты. Ал кешегі ұсы­нылған ақпарат бойынша, 89 науқас аурудан жазылып шыққан.

Қарағанды облысы